ශ්‍රී ලංකා තුන් ඉරියව් ක්‍රීඩක වනිදු හසරංගට මෙවර ඉන්දීය ප්‍රිමියර් ලීග් ක්‍රිකට් තරගාවලියට ක්‍රීඩා කිරීමේ අවස්ථාව අහිමි වී තිබෙනවා.
මෙරට ක්‍රිකට් ආයතනය විසින් ඉන්දීය ක්‍රිකට් පාලක මණ්ඩලයට දැනුම් දී ඇත්තේ වනිදු ආබාධයකට ලක්ව සිටීම හේතුවෙන් 2024 අයි.පී.එල් තරගාවලියට ක්‍රීඩා කිරීමට නොහැකි වනු ඇති බවයි.
ඒ අනුව සන්රයිසස් හයිදරාබාද් කණ්ඩායමට වනිදු වෙනුවට වෙනත් ක්‍රීඩකයෙකු සංචිතයට ආදේශ කිරීමට ද ඉදිරියේ දී කටයුතු කරනු ඇති.
වනිදු හසරංග වම් වළලුකර ප්‍රදේශයේ ආබාධයකින් පසුවන බැවින් එය සම්පූර්ණයෙන් සුව කර ගැනීම සදහා ඔහුට පුනරුත්තාපන කටයුතුවල හා විවේකීව කාලය ගත කිරීමට සිදු වන බවයි ශ්‍රී ලංකා ක්‍රිකට් ආයතනය විසින් ඉන්දීය ක්‍රිකට් පාලක මණ්ඩලයට දැනුම් දී ඇත්තේ.
එමෙන්ම මීට දින කිහිපයට පෙර වනිදු වැඩිදුර වෛද්‍ය උපදෙස් ලබා ගැනීම සදහා ඩුබායි රාජ්‍ය වෙත පිටත්ව ගොස් තිබුණා.
එහි දින තුනක පමණ කාලයක් ඔහු රැදී සිට ඇති අතර, එහිදී වෛද්‍ය උපදෙස් ලැබී ඇත්තේ ඔහුට මෙවර අයි.පී.එල් තරගාවලියට සහභාගී නොවී විවේක ගන්නා ලෙසයි.
ශ්‍රී ලංකා විස්සයි 20 කණ්ඩායමේ නායකයා ද ඔහු වන බැවින් ශ්‍රී ලංකා ක්‍රිකට් ආයතනයේ හා වනිදු හසරංගගේ ද ප්‍රධාන ඉලක්කය වී ඇත්තේ ජූනි මාසයේ පැවැත්වෙන පන්දුවාර විස්සයි 20 ලෝක කුසලාන ක්‍රිකට් තරගාවලිය සදහා සූදානම් වීම බව නොරහසක්.
ලෝක කුසලාන තරගාවලිය ආරම්භ වීමට නියමිතව ඇත්තේ අයි.පී.එල් තරගාවලිය මැයි 26 වැනිදා අවසන් වී දින පහක පමණ කාලයකින් පසුවයි.
