අසල්වැසි ඉන්දියාව තුළ පුවත් මවන තරගාවලියක් බවට මේ වනවිට අයි.පී.එල් තරගාවලිය පත්ව තිබෙනවා.
මේ දිනවල ක්‍රියාත්මක ඉන්දීය ප්‍රිමියර් ලීග් තරගාවලියට සම්බන්ධ සිදුවීම් අතුරින් පළමු පුද්ගල ඝාතනය පිළිබඳ පුවතක් ඉන්දීය මාධ්‍ය ඊයේ (01) වාර්තා කර තිබුණා.
පසුගිය දා පැවති මුම්බායි ඉන්දියන්ස් සහ සන්රයිසස් හයිද්‍රාබාද් අතර තරගය (පසුගිය 27 වනදා පැවති තරගය) අතර තුර මෙම පුද්ගල ඝාතනය සිදුව ඇති බවයි තොරතුරු වාර්තා වන්නේ.
මෙම තරගයේ දී මුම්බායි ඉන්දියන්ස් හිටපු නායක රෝහිත් ශර්මාගේ දැවීයාම සැමරූ පුද්ගලයෙක්ව ඔහුගේ මිතුරා විසින් පහර දී ඝාතනය කර ඇති බවයි වාර්තා වුණේ.
මහාරාෂ්ට්‍ර ප්‍රාන්තයේ කොල්හාපූර් නගරයේ අනුමන්ත්වාඩි ගම්මානයේ පදිංචි බන්ධොපාන්ද් තිබිලේ නැමැති 63 හැවිරිදි පුද්ගලයෙක් 50 හැවිරිදි බලවන්ත් ජන්ජේ නැමැති තවත් මිතුරෙකු සමඟ මෙම තරගය නැරඹීම සඳහා වෙනත් මිතුරෙකුගේ නිවසකට ගොස් තිබෙනවා.
එහිදී මොවුන් තිදෙනාම එක්ව තරගය නරඹා ඇති අතර තරගයේ දී රෝහිත් ශර්මා ලකුණු 26කට දැවියාමෙන් පසු 63 හැවිරිදි තිබිලේ එම සතුට සමරා ඇති බවයි වාර්තා වන්නේ.
ඊට කෝපයට පත් වූ රෝහිත් ශර්මාගේ දැඩි රසිකයෙක් වූ ජන්ජේ නැමැති පුද්ගලයා තිබිලේට පහර දී ඝාතනය කර ඇති බවයි ඉන්දීය මාධ්‍ය වාර්තා කළේ.
මෙම සිද්ධිය සම්බන්ධයෙන් සැකකරුවන් දෙදෙනක් අත්අඩංගුවට ගෙන ඇති අතර, ඔවුන් අධිකරණයට ඉදිරිපත් කිරීමෙන් පසු රක්ෂිත බන්ධනාගාර කිරීමට නියෝග කර තිබෙනවා.
