කාන්තාවන්ට සහ දැරියන්ට බලපාන ප්‍රබල නීති රැසක් සංශෝධනය කිරීමට ආණ්ඩුව විසින් උත්සහ ගනු ලැබුවද විපක්ෂය එයට දැඩි විරෝධයක් දැක්වීම හේතුවෙන් අදාළ පනත ඉවත්කර ගැනීමට සිදුවූ බව විපක්ෂ නායක සජිත් ප්‍රේමදාස පවසනවා.
පාර්ලිමේන්තුවේ තමා වැඩිපුර කතා කරනවා කියා චෝදනාවක් එල්ල වුවද තමන් එලෙස කතා කරනුයේ පුද්ගලික දේවල් නොව ලක්ෂ 220 ජනතාවගේ අයිතීන් සම්බන්ධයෙන් බවයි විපක්ෂනායකවරයා මෙහිදී අවධාරණය කළේ.
රජය, දැරියන් ලිංගික ක්‍රියාදාමවලදී කටයුතු කිරීමේ වයස අවුරුදු 16 සිට 14 දක්වා අඩු කළ බවත් කාන්තාවට අතවර කරනු ලබන පිරිමි පුද්ගලයන් අවුරුදු 22ට අඩු නම් දඩුවම ලිහිල් කිරීමටත් මෙම නව නීති මගින් කටයුතු කර ඇති බවද විපක්ෂනායකවරයා සදහන් කළා.
එමෙන්ම විවිධ අවස්ථාවල අතවරයට ලක්වන කාන්තාවන් වෙනුවෙන් විශේෂිතව තිබූ නීතිය සඳහා පිරිමි පාර්ශ්වයට සිදුවන අතවර යන නීතියත් එකට එකතු කර එම නීති දෙකම එක නීතියක් ලෙස සම්පාදනය කිරීමට රජය සුදානම්වූ බවත් ඔහු තවදුරටත් කියා සිටියා.
මේ සම්න්ධයෙන් තමා පාර්ලිමේන්තුවේ නැගි හඬ හේතුවෙන් කාන්තාවන් , දැරියන් කෙලෙසන මෙම නීති රීති ඉල්ලා අස් කර ගත් බවත් මෙය සමස්ත කාන්තාවන් හා දැරියන් වෙනුවෙන් ලැබූ සුවිශාල ජයග්‍රහණයක් බවත් විපක්ෂනායක සජිත් ප්‍රේමදාස ප්‍රකාශ කළා.
විපක්ෂනායකවරයා මේ බව කියා සිටියේ ඊයේ (23) දින ගාල්ලේ සමනල ක්‍රීඩාංගණයේදී පැවැති සමගි වනිතා බලවේගයේ කාන්තා සමුළුව අමතමින්.
