කැනඩාවේ ඔටාවා හී බාර්හේවන් හී දී ඝාතනයට ලක් වූ ශ්‍රී ලාංකික පවුලේ සාමාජිකයින් 05 දෙනාගේ සහ ඔවුන්ගේ මිතුරාගේ අවසන් කටයුතු ඊයේ (17) සිදු කෙරුණා.
ඔටාවා හී දී සිදුකෙරුණු මෙම අවසන් කටයුතු සඳහා ප්‍රහාරයෙන් දිවි බේරාගත් ශ්‍රී ලාංකික පවුලේ පියා වන ධනුෂ්ක වික්‍රමසිංහ ද එක්ව සිටි බවයි වාර්තා වුණේ.
මෙම අවමංගල්‍ය උත්සව අවස්ථාවට එක් වූ පුද්ගලයින්ට ශෝක ප්‍රකාශයන් සටහන් තැබීමට ද මෙහිදී අවස්ථාව සලසා දී තිබුණා.
සියයකට වැඩි පිරිසක් කඳුළු පිරුණු දෙනෙතින් මෙම අවමංගල්‍ය උත්සව සඳහා එක්ව සිටි බවයි එරට මාධ්‍ය වාර්තා කළේ.
කැනඩාවේ බෞද්ධ සම්මේලනය විසින් අවමංගල්‍ය උත්සවයේ කටයුතු සංවිධාන කර තිබුණා.
හිල්ඩා ජයවර්ධනාරාමයේ භික්ෂූන් වහන්සේ අවමංගල්‍ය උත්සවයේ ආගමික වතාවත් සිදු කළා.
මීට අමතරව ඔටාවාහි ශ්‍රී ලංකා කතෝලිකයන් පිරිසක් නේපීන්හි ශාන්ත මොනිකා දේවස්ථානයේ දී, මියගිය පිරිස් වෙනුවෙන් අනුස්මරණ දේව මෙහෙයක් පැවැත් වූ බවද කැනඩා මාධ්‍ය වාර්තා කර තිබෙනවා.
අවමංගල්‍ය උත්සවය සඳහා ඔටාවාහි නගරාධිපති මාර්ක් සට්ක්ලිෆ්, කැනඩාවේ ස්වදේශික සබඳතා පිළිබඳ අමාත්‍ය ගැරී ආනන්දසංගරී ඇතුළු පිරිසක් ද සහභාගී වී සිටියා.
මේ අතර අගමැති ජස්ටින් ටෘඩෝ ශෝක පණිවිඩයක් එවා තිබූ බව මාධ්‍ය වාර්තා කළා.
පසුගිය මාර්තු 06 වන දින 19 හැවිරිදි ශ්‍රී ලාංකික සිසුවෙකු විසින් මෙම ඝාතනයන් සිදුකර තිබුණා.
මෙම ඝාතනයක් පිළිබඳව වාර්තා කරමින් කැනඩා මාධ්‍ය සඳහන් කළේ ඔටාවා ඉතිහාසයේ දරුණුතම සමූහ ඝාතනය මෙය බවයි.
