ගම්වාසීන් පිරිසකට පහරදීමේ සිද්ධිය සම්බන්ධයෙන් අත්අඩංගුවට ගැනුණු උඩප්පුව පොලිසියේ අපරාධ විමර්ශන අංශයේ ස්ථානාධිපතිවරයා අධිකරණයට ඉදිරිපත් කිරීමෙන් අනතුරුව ඇප මත මුදාහැර තිබෙනවා.
සිද්ධිය සම්බන්ධයෙන් සිදු කෙරෙන විමර්ශන හේතුවෙන් ඔහුගේ වැඩ තාවකාලිකව තහනම් කිරීමටද ඊයේ (06) පියවර ගැනුණා.
පසුගිය 05 වැනිදා රාත්‍රියේ සිදුව තිබූ මෙම පහරදීමත් සමඟ හටගත් නොසන්සුන්තාව පාලනය කිරීමට මුන්දලම පොලිසිය කැඳවීමටද පියවර ගනු ලැබුවා.
පුත්තලම උඩප්පුව ප්‍රදේශයේදී පෙරේදා රාත්‍රි 9.30ට පමණ ගැටුමක් හටගෙන තිබුණේ උඩප්පුව පොලීසියේ අපරාධ විමර්ශන අංශයේ ස්ථානාධිපති උප පොලිස් පරීක්ෂක රාජපක්ෂ සහ ප්‍රදේශවාසින් පිරිසක් අතරයි.
පහරදීම සිදුකරන අවස්ථාවේ නිලධාරියා ඉතා අශෝභන ලෙස හැසිරෙමින් රැස්ව සිටි ජනතාවට පරුෂ වචනයෙන් බැණවදින අයුරු පුද්ගලයෙකු විසින් වීඩියෝගත කර තිබුණා.
උඩප්පුව පොලිසියේ අපරාධ විමර්ශන අංශයේ ස්ථානාධිපතිවරයා පහරදීම සිදුකරන්නේ සිවිල් පුද්ගලයින් දෙදෙනෙකු සමඟ ඔහු පැමිණි මෝටර් රථයට ප්‍රදේශවාසීන් කෙළ ගැසූ බව පවසමින්.
පහරදීමෙන් තුවාල ලැබූ ප්‍රදේශවාසින් දෙදෙනෙකු උඩප්පුව ග්‍රාමීය රෝහලට ඇතුළත් කිරීමෙන් පසු එක් අයෙකු හලාවත මහ රෝහලට මාරුකර යවා තිබුණා.
සිද්ධියෙන් පසු තමාටද තුවාල සිදුවූ බව පවසමින් පොලිස් නිලධාරියාද ඊයේ (06) රාත්‍රියේ උඩප්පුව රෝහලට ඇතුලත් වී තිබුණු අතර, ඔහු ඊයේ රෝහලේදීම අත්අඩංගුවට ගෙන ඔහුගේ වැඩ තහනම් කිරීමට පුත්තලම දිසාව භාර නියෝජ්‍ය පොලිස්පති නාලක සිල්වා මහතා පියවර ගෙන තිබෙනවා.
එමෙන්ම, සිද්ධිය සම්බන්ධයෙන් මෝටර් රථයේ සිටි සිවිල් පුද්ගලයින් දෙදෙනාද අත්අඩංගුවට ගැනුණා.
පොලිසිය පැවසුවේ, පහරදෙන අවස්ථාවේ උඩප්පුව පොලිසියේ අපරාධ විමර්ශන අංශයේ ස්ථානාධිපතිවරයා බීමත්ව සිටියේද යන්න තහවුරු කරගැනීමට රුධිර සාම්පල් ලබාගෙන ඇති බවයි.
සිද්ධිය සම්බන්ධයෙන් වැඩිදුර විමර්ශන මුන්දලම පොලිසිය විසින් සිදු කරනු ලබන අතර, අත්අඩංගුවට ගත් පිරිස ස්ථානාධිපතිවරයා අධිකරණයට ඉදිරිපත් කිරීමෙන් අනතුරුව රුපියල් ලක්ෂ 05 ක ශරීර ඇප මත මුදාහැරීමටයි පියවර ගෙන ඇත්තේ.
