ගාලු මුවදොර ගෝඨා ගෝ ගම අරගලය පැවති සමයේ මෙරට රැඳී සිටි බ්රිතාන්ය ජාතික කාන්තාවක වන කෙලිග් ෆ්රේසර් නමැත්තියගේ වීසා අවලංගු කොට ඇයට රටින් පිටවිය යුතු යැයි ආගමන හා විගමන පාලකවරයා විසින් නිකුත් කරනු ලැබූ නියෝගයක් බල රහිත කිරීමේ ආඥාවක් නිකුත් කරන ලෙස ඉල්ලා එම කාන්තාව සිය නීතිඥවරු මාර්ගයෙන් ගොනු කළ අභියාචනා පෙත්සමක් නිෂ්ප්රභ කළ ශ්රේෂ්ඨාධිකරණය ඇය විසින් රුපියල් 250000/- ක නඩු ගාස්තුවක් ගෙවිය යුතු බවත් නියෝග කළා.
මහින්ද සමයවර්ධන, ශිරාන් ගුණරත්න යන විනිසුරුවරුන්ගේ එකඟත්වය සහිතව ශ්රේෂ්ඨාධිකරණ විනිසුරු ගාමිණී අමරසේකර විසින් මෙම තීන්දුව ප්රකාශයට පත් කරනු ලැබූවා.
නේවාසික වීසා මත මෙරට රැඳී සිටි තමන්ට නිකුත් කර තිබූ වීසා බලපත්ර අවලංගු කළ ආගමන හා විගමන දෙපාර්තමේන්තුව විසින් 2022 වසරේ අගෝස්තු මස 15 වනදාට පෙර රටින් පිටවන ලෙස තමාට නියෝග කළ බව පෙත්සම්කාරිය අධිකරණය හමුවේ ගොනු කළ පෙත්සමේ සඳහන් කළා.
ඉන් අනතුරුව පෙත්සම්කාරිය විසින් ආගමන හා විගමන පාලකවරයාගේ තීරණය අභියෝගයට ලක් කරමින් අභියාචනාධිකරණය හමුවේ රිට් පෙත්සමක් ඉදිරිපත් කළ අතර ඒ පිළිබඳව සලකා බැලීමක් සිදුකළ අභියාචනාධිකරණය එය නිෂ්ප්රභ කළ බවත් ඇය කියා සිටියා.
ඉන් අනතුරුව අභියාචනාධිකරණයේ එම නියෝගය නීතියට පටහැනි බවත් එය බල රහිත කිරීමේ නියෝගයක් නිකුත් කරන ලෙස ඉල්ලා ඇය සිය නීතිඥවරු මාර්ගයෙන් ශ්රේෂ්ඨාධිකරණය හමුවේ අභියාචනා පෙත්සමක් ගොනු කළා.
එම අභියාචනා පෙත්සම් විභාගයේ දී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජනරාල් කනිෂ්කා ද සිල්වා විසින් මූලික විරෝධතා මතු කරමින් අදාල අභියාචනා පෙත්සම විභාගයට නොගෙන නිෂ්ප්රභ කරන ලෙස ඉල්ලා සිටියා.
මෙම පෙත්සම විභාග කිරීමට අධිකරණයට බලයක් නොමැති බවත් පෙත්සම්කාරිය සාවද්ය කරුණු අධිකරණයට ඉදිරිපත් කර ඇති අතර ඇය විසින් ඉදිරිපත් කර තිබෙන දිවුරුම් පෙත්සම නීතියට අනුකූලව ඉදිරිපත් කර නොමැති බවත් නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජෙනරාල්වරිය මතු කළ මූලික විරෝධතා වලින් කරුණු දක්වා තිබුණා.
එම මූලික විරෝධතා පිළිබඳ දීර්ඝ විභාගයක් සිදු කළ ශ්රේෂ්ඨාධිකරණය ඒවා පිළිගනිමින් අදාළ අභියාචනා පෙත්සම නිෂ්ප්රභ කිරීමට තීන්දු කළා.
ඉන් අනතුරුව පෙත්සම්කාරිය විසින් රුපියල් 250000 ක නඩු ගාස්තුවක් ගෙවිය යුතු බවත් නඩු තීන්දුවේ සඳහන් වුණා.
