සංචාරක අමාත්ය හරීන් ප්රනාන්දු ලංකාව ඉන්දියාවේ කොටසක් යැයි ප්රසිද්ධියේ කළ ප්රකාශය බරපතළ ප්රකාශයක් බව ජාතික නිදහස් පෙරමුණේ නායක පාර්ලිමේන්තු මන්ත්රී විමල් වීරවංශ පැවසීය.
මෙරට ගුවන්තොටුපළවල සහ වරායවල් ආදී සියල්ලම ඉන්දියාවට දෙන්නේ යැයි ඔහු එහිදී අදහස් කළ බවත් එසේ පැවසීම නිවට සහ නියාලු ක්රියාවත් බවත් එම බරපතළ ප්රකාශය හමුවේ ජනාධිපති රනිල් වික්රමසිංහ, රටේ ස්වෛරීත්වය රැක්කේ අපි කියා පවසන රාජපක්ෂවරු, විපක්ෂ නායකවරයා ඇතුළු බලයට ඉව අල්ලන විපක්ෂයේ අනෙකුත් කල්ලි කණ්ඩායම් කසාය බිව් ගොළුවන් සේ දත කට පූට්ටු කරගෙන සිටිනා බවත් ඔහු පැවසීය.
යම් රටකට අමාත්යවරයෙකු ගොස් තමන්ගේ රට ඒ රටේ කොටසක් කියා කරන ප්රකාශ කිරිම බරපතල බවත් එසේ ප්රකාශයක් කිරිමට සදාචාරාත්මක හා නෛතික බලයක් ඔහුට තිබෙනවාද? යන්න මන්ත්රී විමල් වීරවංශ ප්රශ්න කරයි.
පාර්ලිමේන්තුව තුළ මන්ත්රීවරයකු ලෙස දිවුරුම් දෙන විට රටේ ඒකීයභාවය සහ ස්වෛරීභාවය සුරකින බවට දිවුරුම් දෙන බවත් එය උල්ලංඝනය කරන්න කිසිදු පාර්ලිමේන්තු මන්ත්රීවරයෙකුට හැකියාවක් නොමැති බවත් වීරවංශ වැඩිදුරටත් පැවසීය
