පොළොන්නරුව කන්දකාඩු පුනරුත්ථාපන මධ්‍යස්ථානයේ ඊයේ (04) පස්වරුවේ රැඳවියන් දෙපිරිසක් අතර ඇති වූ ගැටුමකින් එකොළොස් දෙනෙකු තුවාල ලබා ඇති බව මේ වනවිට තොරතුරු වාර්තා වනවා.
රඳවියන් දසදෙනෙකු සහ එක් හමුදා සෙබළෙක් මෙලෙස තුවාල ලබා ඇති අතර, ඔවුන් මේ වනවිට වැලිකන්ද රෝහලේ ප්‍රතිකාර ලබනවා.
මෙම ගැටුමේ දී රැඳවියන් විසින් පුනරුත්ථාපන මධ්‍යස්ථානයේ මුළුතැන්ගෙය සහ තවත් ස්ථාන කිහිපයක දේපළවලට අලාභ හානි සිදුකර ඇති බවයි වැලිකන්ද පොලිසිය සඳහන් කළේ.
පුනරුත්ථාපන මධ්‍යස්ථානයේ දේපළවලට හානි සිදුකිරීමට සහ ගැටුම ඇතිකර ගැනීමට යොදාගත් පොලු මුඟුරු සහ මත්ද්‍රව්‍ය තොගයක් ද සිදුකළ සෝදිසි කිරීම්වල දී සොයාගෙන තිබෙනවා.
මේ අතර ඊයේ (04) අලුයම් කාලයේ දී පළාගිය රැඳවියන් 20දෙනෙකුගෙන් යුත් කණ්ඩායමක සිටි කිහිපදෙනෙක් සෝමවතියේ වන්දනාවේ පැමිණි බස් රථයක් පැහැරගැනීමට උත්සාහ කර ඇති අතර, ව්‍යාපාරිකයෙකුට අයත් රුපියල් පනස්දාහක මුදලක් සහ ජංගම දුරකථන 02ක් ද පැහැරගෙන ඇති බවට ද තොරතුරු වාර්තා වුණා.
මෙලෙස පළාගිය රැඳවියන් 20 දෙනා සහ ගැටුමේ දී පුනරුත්ථාපන මධ්‍යස්ථානයේ දේපළවලට හානි කිරීම සම්බන්ධයෙන් අත්අඩංගුවට ගැනුණු තවත් රැඳවියන් 14 දෙනෙක් ද මේ වනවිට පොලිසිය අත්අඩංගුවට ගෙන ඇති බවයි වාර්තා වුණේ.
අත්අඩංගුවට ගැනුණු මෙම රැඳවියන් 34 දෙනා අද (05) දිනයේ දී පොළොන්නරුව මහේස්ත්‍රාත් අධිකරණයට ඉදිරිපත් කිරිමට නියමිතව තිබෙනවා.
යුද හමුදාව සහ පොලිසිය එක්ව මේ වනවිට පුනරුත්ථාපන මධ්‍යස්ථානයේ තත්ත්වය සම්පූර්ණයෙන්ම පාලනයකර ඇති බව සඳහන්.
කන්දකාඩු පුනරුත්ථාපන මධ්‍යස්ථානයේ රැඳවියන් අවස්ථා කිහිපයක දී මීට පෙර ද ගැටුම් ඇතිකරගමින් පළාගොස් තිබුණා.
