කරන්දෙණිය පොලිස් වසමේ තල්ගහවත්ත, මුල්කැටියාතොට ප්‍රදේශයේ පදිංචි කාන්තාවක් පසුගිය 21 වනදා සිහිසුන්ව නිවස තුළ වැටී සිටිය දී එය දුටු අසල්වාසියෙක් ඇයව සුවසැරිය ගිලන් රථයකින් ඇල්පිටිය මූලික රෝහලට ඇතුළත් කර තිබෙනවා.
දින කිහිපයක් ඇය සිහිසුන්ව රෝහලේ ප්‍රතිකාර ලබමින් සිටිය දී පසුගිය 25 වනදා මියගොස් ඇති බවයි වාර්තා වුණේ.
පසුව ඇයගේ මෘත ශරීරය පරීක්ෂා කර බැලූ වෛද්‍යවරුන්ට සිරුරේ සීරීම් හා තුවාල සිදුව ඇති ආකාරය නිරීක්ෂණය වී තිබෙනවා.
ඒ, සම්බන්ධයෙන් මතු වූ සැකය මත වැඩිදුරටත් සිදුකරන ලද පරීක්ෂණවල දී ඇය දූෂණයට ලක්ව ඇති බවයි අනාවරණය වී ඇත්තේ.
අනතුරුව මේ පිළිබඳව කරන්දෙණිය පොලිසිය දැනුවත් කිරීමට රෝහල කටයුතු කර ඇති අතර, පසුව පොලිසිය විසින් සැකපිට පුද්ගලයෙක් අත්අඩංගුවට ගෙන තිබෙනවා.
සැකකරුගෙන් සිදුකළ ප්‍රශ්න කිරීම්වල දී ඔහු විසින් අදාළ කාන්තාව දූෂණය කර ඇති බවටයි අනාවරණය කරගෙන ඇත්තේ.
මෙලෙස අත්අඩංගුවට ගැනුණු සැකකරු අදාළ කාන්තාවගේ නිවසට නිරත ආ ගිය පුද්ගලයෙක්.
මේ අතර සිද්ධිය වූ ස්ථානයේ මහේස්ත්‍රාත් පරීක්ෂණය ඇල්පිටිය වැඩබලන මහේස්ත්‍රාත්වරයා විසින් සිදුකළ බවයි අප වාර්තාකරු පැවසුවේ.
මෙලෙස මියගිය කාන්තාව 74 හැවිරිදි වියේ පසුවන අතර, ඇය නිවසේ තනිව ජීවත්ව සිට ඇති බවයි වාර්තා වුණේ.
මෘත දේහය සම්බන්ධයෙන්වන පශ්චාත් මරණ පරීක්ෂණය ඇල්පිටිය මූලික රෝහලේ දී අනිද්දා (29) දිනයේ සිදුකිරීමට නියමිතව තිබෙනවා.
සිද්ධිය සම්බන්ධව කරන්දෙණිය පොලිසිය වැඩිදුර පරීක්ෂණ පවත්වනු ලබනවා.
