උගන්ඩාවේ නිල සංචාරයක නිරත ජනාධිපති රනිල් වික්රමසිංහ මහතා සහ උගන්ඩා ජනරජයේ ජනාධිපති යොවේරි මුසෙවේනි (Yoweri Museveni) මහතා අතර නිල හමුවක් සිදුවී තිබෙනවා.
ඊයේ (20) පස්වරුවේ පැවති මෙම හමුවේදී උගන්ඩා ජනාධිපතිවරයා විසින් ජනාධිපති රනිල් වික්රමසිංහ මහතා ඉතා මිත්රශීලි ලෙස පිළිගත් බවයි ජනාධිපති මාධ්ය අංශය සඳහන් කළේ.
නායක දෙපළ අතර සුහද කථා බහකින් අනතුරුව ද්විපාර්ශ්වික සාකච්ඡා ආරම්භ කරනු ලැබුවා.
තම ආරාධනය අනුව උගන්ඩා නිල සංචාරයට එක්වීම පිළිබඳ මෙහිදී ජනාධිපති රනිල් වික්රමසිංහ මහතා වෙත සතුට පළ කළ උගන්ඩා ජනාධිපති යොවේරි මුසෙවේනි මහතා වැටී තිබූ ශ්රී ලංකා ආර්ථිකය යළි නගා සිටුවීම සඳහා ජනාධිපති රනිල් වික්රමසිංහ මහතා ලබා දුන් නායකත්වය අගය කළ අතර ඊට ජාතියේ ප්රණාමය හිමි විය යුතු බවයි කියා සිටියේ.
ශ්රී ලංකාවේ නව ආර්ථික වැඩපිළිවෙළ පිළිබඳව මෙහිදී නායකයන් සාකච්ඡා කර තිබෙනවා. ජනාධිපති රනිල් වික්රමසිංහ මහතා සඳහන් කළේ ජාත්යන්තර මූල්ය අරමුදල සමඟ ගිවිසුමට එළැඹීමෙන් පසුව ශ්රී ලංකාව ආර්ථික වශයෙන් ඉදිරියට යමින් සිටින අතර 2024 වසරේ නව වර්ධනයක් සමඟ අපේක්ෂිත ඉලක්ක කරා ගමන් කරමින් සිටින බවයි.
ශ්රී ලංකා විදේශ කටයුතු අමාත්යවරයා ද මෙහිදී අදහස් දක්වා තිබෙනවා.
බිඳ වැටුණු ශ්රී ලංකා ආර්ථිකය යළි ගොඩනැගීම ඉතා සංකීර්ණ කාර්යයක් වූ අතර ඒ සඳහා රනිල් වික්රමසිංහ මහතාට අවස්ථාව ලබාදිය යුතු බව ශ්රි ලංකාවේ බොහෝ මධ්යස්ථ මතධාරීන්ගේ මතය වූ බවයි ඔහු සිහිපත් කළේ. ශ්රී ලංකා ආර්ථිකය යළි ගොඩනැගීම වෙනුවෙන් ජනාධිපතිවරයා ඉතා කෙටි කලක් තුළ ගෙන ගිය වැඩපිළිවෙළ හේතුවෙන් ශ්රී ලංකාව ආර්ථික ස්ථාවරත්වයක් උදා කර ගෙන ඇති බව පෙන්වා දුන් විදේශ කටයුතු අමාත්යවරයා ජනාධිපතිවරයාගේ එම කාර්යභාරය බොහෝ දෙනෙකුගේ ඇගයීමට ලක්ව ඇති බව ද සඳහන් කළා.
ශ්රී ලංකාව සහ උගන්ඩාව අතර පවතින ද්විපාර්ශ්වික සබඳතා නව ක්ෂේත්ර ඔස්සේ තවදුරටත් ශක්තිමත් කර ගැනීම පිළිබඳව මෙහිදී දෙපාර්ශ්වය දීර්ඝ ලෙස සාකච්ඡා කර තිබෙනවා.
