මන්නාරම, නඩුකුඩා ප්‍රදේශයේ සිදු කළ විශේෂ මෙහෙයුමක් මඟින් වලංගු බලපත්‍ර නොමැතිව නීති විරෝධී ලෙස මුහුදු කූඩැල්ලන් ප්‍රවාහනය කරමින් සිටි පුද්ගලයින් 16 දෙනෙකු සමඟ මුහුදු කූඩැල්ලන් 1280ක පමණ තොගයක් නාවික හමුදා භාරයට ගෙන තිබෙනවා.
උතුරු මැද නාවික විධානය මගින් ඊයේ මන්නාරම, නඩුකුඩා ප්‍රදේශයේ සිදු කළ විශේෂ සෝදිසි මෙහෙයුමකදී එම ප්‍රදේශය ඔස්සේ ගමන් කරමින් තිබූ සැක කටයුතු කැබ් රථයක් පරික්‍ෂා කර තිබුණා.
එහිදී, වලංගු බලපත්‍ර නොමැතිව නීති විරෝධී ලෙස මුහුදු කූඩැල්ලන් තොගයක් ප්‍රවාහනය කරමින් සිටි පුද්ගලයන් සහ එම කැබ් රථය නාවික හමුදා භාරයට ගෙන තිබෙනවා.
සැකකරුවන් අවුරුදු 24 ත් 54 ත් අතර වයසේ පසුවන වංකාලේ, මන්නාරම සහ වීරවිල් යන ප්‍රදේශයන්හි පදිංචිකරුවන් බවටයි හඳුනා ගෙන ඇත්තේ.
එම සැකකරුවන්, මුහුදු කූඩැල්ලන් තොගය සහ කැබ් රථය ඉදිරි නීතීමය කටයුතු සඳහා මන්නාරම සහකාර ධීවර අධ්‍යක්‍ෂක කාර්යාලය වෙත භාර දී තිබෙනවා.
