ඉරාන ජෙනරාල් කාසෙම් සොලෙයිමානි එක්සත් ජනපදය විසින් ඝාතනය කර වසර 4ක් ගතවීම වෙනුවෙන් පැවති සංවත්සර සැමරුමට එල්ල වූ බෝම්බ ප්රහාර දෙකකින් මියගිය සංඛ්යාව 103ක් දක්වා ඉහළ ගොස් තිබෙනවා.
ඔහුගේ සොහොන අසලට යමින් සිටි පිරිසක් ඉලක්ක කර මෙම බෝම්බ පිපිරීම් දෙක සිදුවී ඇති බවයි විදෙස් මාධ්ය වාර්තා කළේ.
පිපිරීම්වලින් තවත් විශාල පිරිසක් තුවාල ලබා ඇතැයි සඳහන්. මෙය ත්රස්තවාදී ප්රහාරයක් බවට චෝදනා එල්ලවී තිබෙනවා.
පිපිරීම් පිටුපස සිටින්නේ කවුරුන්ද යන්න පැහැදිලි නැති අතර කිසිදු කණ්ඩායමකින් ක්ෂණිකව වගකීම භාරගෙන නැහැ.
එහෙත් අරාබි බෙදුම්වාදීන්, ඉස්ලාමීය රාජ්ය (අයිඑස්) සහ අනෙකුත් සුන්නි ජිහාඩ් කණ්ඩායම් පවසා ඇත්තේ ඔවුන් මෑත වසරවලදී එරට ආරක්ෂක අංශවලට සහ ෂියා සිද්ධස්ථානවලට මාරාන්තික ප්රහාර එල්ල කළ බවයි.
2020 වසරේ දී අසල්වැසි ඉරාකයේදී එක්සත් ජනපද ඩ්රෝන් ප්රහාරයකින් මිය ගිය සොලෙයිමානි උත්තරීතර නායක අයතුල්ලා අලි කමේනිට පසුව ඉරානයේ බලවත්ම පුද්ගලයා ලෙසටයි සැලකුණේ.
රාජ්ය මාධ්ය ප්රාදේශීය හදිසි සේවා දෙපාර්තමේන්තුව උපුටා දක්වමින් කියා සිටියේ පිපිරීම්වලින් 103 දෙනෙකු මිය ගොස් තවත් 141 දෙනෙකු තුවාල ලබා ඇති බවයි. තුවාල ලැබූවන්ගෙන් සමහරක් අසාධ්ය තත්ත්වයේ පසුවන බවද ඔවුන් වැඩිදුරටත් ප්රකාශ කළා.
සොලෙයිමානිගේ සොහොනට මෙම ප්රහාරවලින් හානියක් සිදුවී නොමැති බව සඳහන්.
හමාස් සහ හිස්බුල්ලා ඇතුළු මිත්ර ආන්ඩු සහ සන්නද්ධ කණ්ඩායම් සඳහා Quds Force හි රහසිගත මෙහෙයුම් සහ එහි මාර්ගෝපදේශනය, අරමුදල්, ආයුධ, බුද්ධි සහ සැපයුම් සහය සැපයීම භාරව සිටියේ ඔහුයි.
2020 ඝාතනයට අණ දුන් එවකට එක්සත් ජනපද ජනාධිපති ඩොනල්ඩ් ට්රම්ප්, සුලෙයිමානි හඳුන්වා දෙනු ලැබුවේ ලෝකයේ ඕනෑම තැනක සිටින අංක එකේ ත්රස්තවාදියා ලෙසටයි.
