කුවේට් රාජ්යයේ නායක ෂෙයික් එමීර් නවාෆ් අල් අහමඩ් අල්-ජාබර් අල් සබා අභාවප්රාප්ත වී තිබෙනවා.
මියයන විට ඔහු 86 වන වියේ පසුවූ බවයි කුවේට් රාජ්ය රූපවාහිනිය නිවේදනය කර ඇත්තේ.
අභාවය පිළිබඳ රාජ්ය රූපවාහිනියේ විකාශනය වූ නිවේදනයෙන් පසු නාලිකාවේ නිතිපතා වැඩසටහන් මේවන විට නතර කර තිබෙනවා.
ඔටුන්න හිමි කුමරු, 83 හැවිරිදි ෂීක් මිෂාල් අල්-අහ්මඩ් අනුප්රාප්තිකයා ලෙසට නම් කර ඇතැයි සඳහන්.
කුවේට් රාජ්යයේ දින 40ක ශෝක කාලයක් ප්රකාශයට පත් කර ඇති අතර රජයේ කාර්යාල දින තුනක් වසා තැබීමට නියමිතයි.
“ඉතා ශෝකයෙන් හා ශෝකයෙන්, අපි ශෝක වන්නෙමු… ෂෙයික් නවාෆ් අල්-අහ්මඩ් අල්-සබාහ්ගේ අභාවය” යනුවෙන් රාජ්ය රූපවාහිනියේ විකාශනය කර තිබෙනවා.
ෂෙයික් නවාෆ් 2006 වසරේදී ඔටුන්න හිමි කුමරු ලෙස නම් කරන ලද අතර 2020 දී එමීර්වරයා ලෙස වැඩ භාර ගනු ලැබුවා.
1937 දී උපත ලද ඔහු කුවේටයේ හිටපු පාලක ෂෙයික් අහමඩ් අල්-ජාබර් අල්-සබාගේ පස්වන පුත්රයායි.
1990 වසරේදී ඉරාකය කුවේටය ආක්රමණය කිරීමේදී ඔහු කටයුතු කළේ ආරක්ෂක අමාත්යවරයා ලෙසටයි. පසුව අභ්යන්තර කටයුතු අමාත්යවරයා ලෙස ද සේවය කළා.
දශකයකට වැඩි කාලයක් එමීර්වරයා ලෙස සේවය කළ ඔහුගේ පූර්වගාමියා හා සසඳන විට, ෂෙයික් නවාෆ් පාලකයා ලෙස ගත කළ කාලය සාපේක්ෂව කෙටියි.
විදේශ කම්කරුවන් මිලියන 3.4ක් ද ඇතුළුව මිලියන 4.8ක ජනගහනයක් සිටින කුවේටය ලොව හයවන විශාලතම තෙල් සංචිත ඇති රටක් වන අතර එය එක්සත් ජනපදයේ ප්රධාන මිත්ර රටක් ද වනවා.
ප්රධාන රජයේ සහ විධායක තනතුරුවල පූර්ණ පාලනය පාලක පවුල සතු වන අතර දේශපාලන කාරණා සම්බන්ධයෙන් අවසාන ප්රකාශය එමීර්වරයා සතුයි. පාර්ලිමේන්තුව අභිබවා යාමට හෝ විසුරුවා හැරීමට සහ මැතිවරණ කැඳවීමට ඔහුට බලය පවතිනවා.
