උතුරු පළාතේ ප්‍රදේශ රැසකට ද පවතින වර්ෂාව හමුවේ වව්නියාව දිස්ත්‍රික්කයේ විශාලතම ජලාශයක් වූ පාවක්කුලම වැවේ වාන් දොරටු විවෘත කර තිබෙනවා. අප වාර්තාකරු සඳහන් කළේ වැවේ වාන් දොරටු 3ක් විවෘත කර ඇති බවයි.
පාවක්කුලම වැවේ ජල මට්ටම සීග්‍රයෙන් වැඩිවීම හේතුවෙන් අද (22) සිට වාන් දොරටු 3ක් විවෘත කිරීමට පියවර ගත් බවයි වව්නියාව දිසාපති පී.ඒ. සරත්චන්ද්‍ර මහතා ප්‍රකාශ කළේ.
අක්කර අඩි 27,000ක ජල ධාරිතාවයකින් යුත්පාවක්කුලම වැවෙහි පළමු වතාවට වාන් දොරටු දෙකක් අඟල් 12 බැගින්ද වාන් තවත් වාන් දොරටුවක් අඟල් 18 බැගින් ද විවෘත කර තිබෙනවා.
ඊයේ (21) සවස වන විට මෙම වැවෙහි ජල ධාරිතාව අක්කර අඩි 26,000 ඉක්මවීමෙන් පසුව ඇති විය හැකි අවධානම සැලකිල්ලට ගනිමින් මෙලෙස වාන් දොරටු විවෘත කිරීමට පියවර ගත් බවයි දිස්ත්‍රීක් ලේකම්වරයා කියාසිටියේ.
වාන් දොරටු විවෘත කිරීමෙන් පසු තත්පරයට ඝන අඩි 680ක ජල ධාරිතාවක් වැවෙන් මුදාහැරෙන බැවින් පහත් බිම්වල ජනතාව අවධානයෙන් සිටින ලෙසට ද දැනුම් දෙනවා.
පාවක්කුලම වැවේ වාන් දොරටු විවෘත්ත කිරීම හේතුවෙන් පහත්බිම්වල සිටින ජනතාවට ඇති විය හැකි බලපෑම පිළිබඳව සොයා බැලීමට ද වව්නියාව දිසාපති පී.ඒ. සරත්චන්ද්‍ර මහතා ඇතුලු වාරිමාර්ග නිලධාරීන් පිරිසක් විසින් පාවක්කුලම් වැව හා අවට ප්‍රදේශයේ නිරීක්ෂණයක නිරත වෙමින් ජනතාව දැනුවත් කිරීමට ද පියවර ගෙන තිබෙනවා.
