ඊශ්‍රායලය පලස්තීන සිවිල් වැසියන්ට දැනුම්දීමක් කර තිබෙනවා.
ඒ ගාසා තීරයේ විශාලතම රෝහල වන අල් ෂිෆා හි තවමත් රැඳී සිටින පලස්තීනුවන් හට වහාම යටත් වන ලෙසට ඊශ්‍රායලය දැනුම්දී ඇති බවයි වාර්තා වන්නේ.
අද අලුයම වන විට අල් ෂිෆා රෝහල් පරිශ්‍රය වැටලීමට ඊශ්‍රායල හමුදාව පියවර ගත්තා.
ගාසා සෞඛ්‍ය අමාත්‍යාංශයේ අධ්‍යක්ෂ ජනරාල් මුනීර් අල් බර්ෂ් විසින් අල් ජසීරා පුවත් සේවයට පවසනු ලැබුවේ ඊශ්‍රායල හමුදාව වෛද්‍ය සංකීර්ණයේ බටහිර පැත්ත වැටලූ බවයි.
තමන් සිටින පළාත ම අළු දුහුවිලිවලින් පිරී ඇති බවත්, රෝහලේ බටහිර කොටසෙහි විශාල පිපිරුමක් සිදු ව ඇති බවටත් තමන් විශ්වාස කරන බවයි බර්ෂ් සඳහන් කර ඇත්තේ.
එමෙන්ම ආක්‍රමණික හමුදා රෝහලේ බිම් මහලේ සෝදිසි කිරීම්හි යෙදී සිටින අතර, තව මොහොතකින් ඔවුන් ඉහළ මහලයට පැමිණෙනු ඇති බවයි.
ඊශ්‍රායල හමුදා පළමුකොට ම ශල්‍යකර්ම සහ හදිසි අනතුරු ඒකක වැටලූ බව ද ගාසා සෞඛ්‍ය අමාත්‍යාංශයේ රෝහල් අධ්‍යක්ෂ මොහොමඩ් සකෝට් පැවසුවා.
කෙසේවෙතත් මේ වනවිට රොයිටර්ස් වාර්තා කරන පරිදි මුළුමනින් ම අල් ෂිෆා හි ස්වාධීනත්වය බිඳ වැටී තිබෙනවා.
