ශ්රී ලංකාවේ සංචාරයක නිරත ඉන්දීය මුදල් අමාත්ය නිර්මලා සීතාරාමන් මහත්මිය සහ ඉන්දීය මහ කොමසාරිස් ගෝපාල් බග්ලේ මහතා ඇතුළු ඉන්දීය දූත පිරිස ජනාධිපති රනිල් වික්රමසිංහ මහතා හමුවී තිබෙනවා. අද රාත්රී එම හමුව පවැත්වුණේ කොළඹ ජනාධිපති මන්දිරයේදී යි.
ජනාධිපති මාධ්ය අංශය සඳහන් කළේ මෙහිදී ඔවුන් ද්වීපාර්ශ්වික සාකච්ඡාවල ද නිරත වූ බවයි.
එමෙන්ම ජනාධිපති රනිල් වික්රමසිංහ මහතා සහ ඉන්දීය මුදල් අමාත්ය නිර්මලා සීතාරාමන් මහත්මිය අතර පැවති ද්විපාර්ශ්වික සාකච්ඡාවේදී ඉන්දියාව සහ ශ්රී ලංකාව අතර බෞද්ධ සබඳතා ප්රවර්ධනය කිරීම වෙනුවෙන් ඉන්දියානු රජය විසින් ප්රදානය කරනු ලබන ඩොලර් මිලියන 15ක ආධාර යටතේ, ව්යාපෘති ක්රියාත්මක කිරීමට අදාළ ද්විපාර්ශ්වික ලේඛන ද හුවමාරු කර ගෙන තිබෙනවා.
මේ අතර කොටගල පිහිටි මවුන්ට් වර්නන් වතුයායේ පහළ දිඹුල කලාපයේ නිවාස දස දහසක් (10,000) ඉදිකිරීමේ ව්යාපෘතිය සඳහා මාර්ගගත ක්රමවේදය ඔස්සේ මුල්ගල් තැබීම සිදු කර තිබෙනවා.
ඒ ජනාධිපති රනිල් වික්රමසිංහ මහතා සහ මුදල් අමාත්ය නිර්මාලා සීතාරාමන් මහත්මිය විසින්.
ඉන්දියානු සම්භවයක් සහිත දෙමළ ජනයා ශ්රී ලංකාවට පැමිණ වසර 200ක් සැපිරීම වෙනුවෙන් පැවැත්වූ ‘නාම් 200’ සංවත්සර උත්සවයේදී මෙම මුල් ගල් තැබීම සිදු කෙරුණා.
මෙම අවස්ථාවට එක් වෙමින් ජනාධිපති රනිල් වික්රමසිංහ මහතා සඳහන් කළේ මෙරට ආර්ථිකය වෙනුවෙන් සුවිශේෂී දායකත්වයක් ලබාදුන් කඳුකර දමිළ ජනතාව වෙනස් ප්රජාවක් ලෙස නොසළකා ඔවුන් සම්පූර්ණයෙන් ශ්රී ලංකා සමාජයට ඒකාබද්ධ කිරීමේ වැඩපිළිවෙළ ක්රියාත්මක කරන බවයි.
ශ්රී ලංකාවේ මූල්ය ස්ථාවරත්වය ඇති කිරීම වෙනුවෙන් ඉන්දීය අග්රාමාත්ය නරේන්ද්ර මෝදි මහතා ප්රමුඛ රජය ලබාදුන් දායකත්වය මෙහිදී සිහිපත් කළ ජනාධිපතිවරයා එම සහාය නොවන්නට අද මෙම උත්සවය සාර්ථකව පැවැත්වීමට නොහැකි බව සඳහන් කළ අතර, ඒ වෙනුවෙන් කැපවූ ඉන්දීය මුදල් අමාත්ය නිර්මලා සීතාරාමන් මහත්මියට විශේෂ ප්රශංසාවක් ද එක් කළා.
ඉන්දීය මුදල් අමාත්ය නිර්මලා සීතාරාමන් මහත්මිය මෙහිදී අදහස් දක්වමින් කියා සිටියේ කඳුකරයේ දමිළ ජනතාව ශ්රී ලාංකීය ආර්ථිකය ශක්තිමත් කිරීම වෙනුවෙන් විශාල දායකත්වයක් ලබා දුන් බවයි. ඔවුන් ඇඟයීමට සහ ඔවුන්ගේ වරප්රසාද දිනා දීමට රජය ගෙන යන වැඩපිළිවෙළ අගය කළ අමාත්යවරිය ඒ සමඟ සහයෝගයෙන් කටයුතු කිරීමට ඉන්දිය රජය කටයුතු කරන බවද ප්රකාශ කළා.
