හමාස් සංවිධානය විසින් ඊශ්‍රායලයට එල්ල කළ ප්‍රහාරවලින් පසු අතුරුදන් බවට වාර්තා පළ වූ ශ්‍රී ලාංකික කාන්තාව ජීවිතක්ෂයට පත්ව ඇති බවට සැකකෙරෙන බව විදේශ සේවා නියුක්ති කාර්යාංශයේ මාධ්‍ය ප්‍රකාශක ගාමිණි සෙනරත් යාපා පවසනවා.
සමාජ මාධ්‍ය හා ලැබුණු තොරතුරු මත එම කාන්තාවට වෙඩි තබා ඝාතනය කර ඇති බවට සැක කෙරෙන බවයි ඔහු අද (10) පෙරවරුවේ මාධ්‍ය හමුවක් කැඳවමින් සඳහන් කළේ.
මේ අතර එම කාන්තාවගේ මෘත දේහය තිබෙන ප්‍රදේශය වෙත යෑමට එරට පිහිටි ශ්‍රී ලංකා තානාපති කාර්යාලයේ නිලධාරීන්ට තවමත් හැකියාවක් ලැබී නොමැති බවත්, ඒ සඳහා ඉල්ලීම් කර ඇති බවත් ඔහු මෙහි දී සඳහන් කර සිටියා.
ඒ, අනුව අදාළ මෘත දේහය හඳුනාගැනීමෙන් අනතුරුව එම කාන්තාව මිය ගොස් ඇති බවට සහතිකයක් නිකුත් කළ හැකි බවයි මාධ්‍ය වෙත අදහස් දක්වමින් මාධ්‍ය ප්‍රකාශකවරයා පැවසුවේ.
අදාළ කාන්තාව 2022 වර්ෂයේ විදේශ සේවා නියුක්ති කාර්යාංශයේ ලියාපදිංචිය යටතේ අවසන් වරට විදෙස් ගත වී ඇති බවට වාර්තා වනවා.
ගම්පහ ප්‍රදේශයේ පදිංචි 49 හැවිරිදි වියේ පසු වූ ඇය සාත්තු සේවය සඳහා ඊශ්‍රායලයට ගොස් ඇති බවයි වාර්තා වන්නේ.
මේ අතර ඊශ්‍රායලය තුළ පවතින නීති රීතිවලට අනුකූලව රාජතාන්ත්‍රික මැදිහත්වීම මත මියගිය බවට සැකකරන කාන්තාවගේ දේහය මෙරටට ගෙන ඒමට බලාපොරොත්තුවන බව මාධ්‍ය ප්‍රකාශක ගාමිණි සෙනරත් යාපා මෙහිදී වැඩිදුරටත් සඳහන් කර සිටියා.
විදෙස් සේවා නියුක්ති කාර්යාංශය ලෙස ඇයට හිමිවිය යුතු සියලුම රක්ෂණ හා වන්දි ගෙවීමට කටයුතු කරන බව ද ඔහු අවධාරණය කර සිටියා.
wpDiscuz
