මහියංගන පෙරහැරට ගොස් සිටියදී වෙඩි ප්‍රහාරයකට ලක්වූ සීතා ඇතින්න සම්බන්ධයෙන් රජයේ හෝ වනජීවී දෙපාර්තමේන්තුවේ කිසිදු සොයා බැලීමක් හෝ උපකාරයක් නොමැති බව එම සත්වයාගේ හිමිකරු වන එම්. එම්. රොෂාන් නොහොත් අලි රොෂාන් පවසනවා.
ඔහු ප්‍රකාශ කළේ තම පෞද්ගලික මුදලින් ඇතින්නට ප්‍රතිකාර කිරීමේ කටයුතු සිදු කරන බවයි.
මෙලෙස වෙඩි වැදී තුවාල ලැබූ ඇතින්න මේ දිනවල ජනප්‍රිය චිත්‍රපටයක මෙන්ම මීට පෙර ද ජනප්‍රිය චිත්‍රපට රැසකට ද රංගන දායකත්වය ලබාදී ඇති සත්වයෙක්.
එමෙන්ම සීතා මෙරට සිටින ඇතින්නියන් අතුරින් දළ දෙකක් හිමි දුර්ලභ ගණයේ ඇතින්නක් වීම ද විශේෂත්වයක්.
මෙම ඇතින්නගේ හිමිකරු ප්‍රකාශ කළේ වෙඩි වැදුණු සත්වයා සම්බන්ධයෙන් මූලික පරීක්ෂා කිරීම් සිදු කළ ද ඉන ්අනතුරුව කිසිදු අයෙක් තම ඇතින්න පිළිබඳ සොයා නොබැලූ බවයි.
“මේ සතා අනතුරට පත් වෙලා දවසකට වඩා වැඩි කාලයක් ගිහින් තියෙනවා. අලි හාම්පුත්තුන්ගේ සංගහමයේ සභාපති පැය කිහිපයක් ඇතුලත, පේරාදෙණිය පශු වෛද්‍ය පීඨයේ මහාචාර්ය අශෝක දංගොල්ල මහත්තයා ඇතුළු විශේෂඥ වෛද්‍ය කණ්ඩායමක් රැගෙන ඇවිත් මේ වෙඩි වැදුන සතා පරික්ෂා කරා. ඊට පස්සේ මේ වනතුරු, රජයේ කිසි වග කිවයුතු නිලධාරියෙක්, වනජිවි දෙපාර්තමේන්තුවේ කිසි කෙනෙක් මා හට කථා කරලා සතාගේ තොරතුරු හොයලා බැලුවේ නෑ. මගේ අතේ තියෙන සල්ලිවලින් දැන් මේ සතාට ප්‍රතිකාර කරගෙන යන්නේ. වෙඩි වැදුන තැන මූනිස්සන් කොයි ආකාරයෙන්, කොච්චර දුර ගිහිල්ලාද, කියලා බලන්න වන ජීවී සංරක්ෂණ දෙපාර්ථමේන්තුවේ සත්වඋද්‍යාන දෙපාර්ථමේන්තුවේ උපකරණ හා පහසුකම් ඇති තරම් තිබිලත් මේ සතා වෙනුවෙන් තවම එහෙම දෙයක් කරන්න කිසි කෙනෙක් විමසීම් හො සොයා බැලීමක් සිදු කළේ නෑ. ඒ ගැන හරි කණගාටුයි. ලංකාවේ හැම දේටම කෑගහන පරිසරවේදින්, අවිහිංසා සංගම් නිලධාරින් මේ සතා වෙනුවෙන තවමත් හඬ අවදි නොකර නිහඬව සිටීමත් මට තියෙන ගැටළුවක් “
