සිනොපෙක් සමාගමේ මෙහෙයුම් සැප්තැම්බර් මාසයේ සිට

සිනොපෙක් සමාගම සැප්තැම්බර් 20 වැනිදා ශ්‍රී ලංකාවේ මෙහෙයුම් ආරම්භ කිරීමට අපේක්ෂා කරන බව විදුලිබල හා බලශක්ති අමාත්‍ය කංචන විජේසේකර පවසනවා.

අමාත්‍යවරයා මාධ්‍යවේදීන් අමතමින් ප්‍රකාශ කර ඇත්තේ රජය විසින් නියම කර ඇති උපරිම සිල්ලර මිලට වඩා අඩුවෙන් ඉන්ධන අලෙවි කිරීමට සිනොපෙක් සමාගමට අවසර දෙන බවයි.

සිනොපෙක් සමාගම ශ්‍රී ලංකාවට පැමිණීම ශ්‍රී ලංකාවේ විදේශ විනිමය සංචිතයට එල්ල වන පීඩනය අවම කිරීමට ඉවහල් වනු ඇති බවයි ඔහු වැඩිදුරටත් ප්‍රකාශ කළේය.

ඔක්තොම්බර් සහ නොවැම්බර් වන විට තවත් ජාත්‍යන්තර ඉන්ධන මෙහෙයුම් සමාගම දෙකක් ශ්‍රී ලංකාවේ මෙහෙයුම් ආරම්භ කිරීමට අපේක්ෂා කරන බව ද ඔහු සඳහන් කර තිබෙනවා.

ඕස්ට්‍රේලියාවේ යුනයිටඩ් පෙට්‍රෝලියම් සහ එක්සත් ජනපද සමාගමක් වන RM Parks Shell ශ්‍රී ලංකාවේ ක්‍රියාත්මක වීමට අනුමැතිය ලබා ඇති අනෙකුත් සමාගම් දෙකයි.

නව ගනුදෙනුව යටතේ, චීන සමාගමට ඉන්ධන පිරවුම්හල් 150ක් පවත්වාගෙන යාම සඳහා වසර 20ක බලපත්‍රයක් ලබා දෙන අතර නව ඉන්ධන පිරවුම්හල් 50ක් සඳහා ආයෝජනය කිරීමට ද අවස්ථාව ලැබෙනු ඇති.

“Sinopec ශ්‍රී ලංකාවේ ඉන්ධන පිරිපහදු ව්‍යාපෘතියක් සඳහා ද සැලසුම් සකස් කර ඇති අතර ඔවුන්ගේ යෝජනා අගෝස්තු මස අවසානයේ භාර දෙනු ඇතැයි අපේක්ෂා කරන බවයි බලශක්ති අමාත්‍යවරයා කියාසිටියේ.

පිරිපහදු ව්‍යාපෘතිය සඳහා ඩොලර් බිලියන 4 ක් පමණ වැය වනු ඇතැයි අපේක්ෂා කරන අතර ඒ සම්බන්ධයෙන් සාකච්ඡා සිදු කෙරෙන්නේ 2019 වසරේ සිටයි.