එක්දින ලෝක කුසලාන තරගාවලියේ එංගලන්තය සහ පාකිස්ථානය අතර තරගය පැවැත්වෙන දිනය වෙනත් දිනයකට ගෙන යන ලෙස බෙංගාල ක්‍රිකට් සංගමය ඉන්දීය ක්‍රිකට් ආයතනයෙන් ඉල්ලීමක් කර තිබෙනවා.
එළඹෙන නොවැම්බර් 12 වනදා කොල්කටා හී ඊඩ්න් ගාර්ඩන් ක්‍රීඩාංගණයේදීයි මෙම තරගය පැවැත්වීමටයි සැලසුම්කර ඇත්තේ.
ඒ, අනුව 12 වනදා පැවැත්වෙන තරගය 11 වනදා පවත්වන ලෙසට ඔවුන් ඉල්ලා ඇති බවයි ක්‍රීඩා මාධ්‍ය වාර්තා කළේ.
මෙම තරගය 12 වනදා පැවැත්වුවහොත් ඒ සඳහා ආරක්ෂාව සැපයීම අපහසු බව කොල්කටා පොලීසිය බෙංගාල ක්‍රිකට් සංගමයට දැනුම්දී තිබෙනවා.
ප්‍රධාන හින්දු උත්සවයක් එදිනට යෙදී තිබීම මීට හේතු වී ඇති බවයි කොල්කටා පොලීසිය සඳහන් කළේ.
එවැනි තත්ත්වයක් පවතින පසුබිමකයි තරගය පැවැත්වෙන දිනය සංශෝධනය කරන ලෙසට බෙංගාල ක්‍රිකට් සංගමය ඉන්දීය ක්‍රිකට් ලේකම් ජේ ෂා වෙත ලිපියක් යොමුකරමින් මෙම ඉල්ලීම සිදුකර ඇත්තේ.
මේ අතර ඔක්තෝබර් මස 15 වනදා අහ්මදාබාද්හීදී පැවැත්වීමට නියමිතව තිබූ ඉන්දියාව සහ පාකිස්තානය අතර තරගය ද ඔක්තෝබර් මස 14 වනදා පැවැත්වීමට මීට පෙර තීරණය කළා.
ඒ, හින්දු උත්සවයක් වන, නව රාත්‍රී උත්සවය ඔක්තෝබර් මස 15 වනදාට යෙදී තිබීම හේතුවෙන්.
මෙලෙස දින වකවානු වෙනස්කරමින් පාකිස්ථානය සමඟ පැවැත්වෙන තරග කාලසටහන සංශෝධනය කළ ද, මෙවර ලෝක කුසලාන තරගාවලියට තම සහභාගීත්වය පිළිබඳව පාකිස්ථානය තවමත් නිල වශයෙන් තහවුරු කර නැහැ.
2023 එක්දින ලෝක කුසලාන තරගාවලිය එළඹෙන ඔක්තෝබර් මස 05 වනදා ඉන්දියාවේ දී ආරම්භ වනවා.
