ඕස්ට්රේලියාවේ Ballarat සිට Sydney දක්වා කිලෝමීටර් 1000ක දුර පා ගමනක් ඕස්ට්රේලියාවේ සිටින ශ්රී ලාංකික සරණාගතයෙකු විසින් ආරම්භ කර තිබෙනවා.
ඔස්ට්රේලියාවේ සරණාගතභාවය පතා සිටින පවුල් වෙත ඕස්ට්රේලියානු අගමැති Anthony Albanese ගේ අවධානය යොමු කිරීමට සහ ඕස්ට්රේලියාවේ ස්ථීර පදිංචිය ලබා ගැනීමේ අරමුණ සහිතවයි මෙම පා ගමන ආරම්භ කර ඇත්තේ.
පැරා සැප්තැම්බර් 09 වනදා විට ගමන අවසාන කිරීමේ අරමුණ ද සහිතව සෑම දිනකම කිලෝමීටර් 30ක් පමණ ඇවිදීමටයි සැලසුම් කර ඇත්තේ.
ස්වේච්ඡා සේවකයන් 100කට වැඩි පිරිසක් ගමනට සහාය වනු ඇතැයි අපේක්ෂා කරන අතර, ඔහුට සහායට වාහනයක් ආසන්නයෙන් පදවාගෙන යාමට සහ සෑම රාත්රියකම නවාතැන් ගැනීමට ස්ථානයක් පිරිනැමීමට ද ඔවුන් සැලසුම් කර තිබෙනවා.
මෙම ශ්රී ලාංකිකයා සිඩ්නි වෙත පැමිණීමෙන් පසු අගමැති ඇන්තනි ඇල්බනීස් වෙත ලබා දීම සඳහා මාර්ගගත පෙත්සමකට අත්සන් 11,500 කට වඩා රැස් කර ඇතැයි සඳහන්.
නීල් පැරා නම් මෙම ශ්රී ලාංකිකයා ඕස්ට්රේලියාවේ ප්රාදේශීය නගරයක් වන Ballarat හි වසර 8 කට වැඩි කාලයක් වීසා නොමැතිව ජීවත් වන බව සඳහන්.
මෙම පුද්ගලයා දශකයකට අසන්න කාලයක් ඕස්ට්රේලියාවේ ජීවත් වන නමුත් නව වීසා යෝජනාවට අනුව ස්ථිර පදිංචිය සඳහා අයදුම් කිරීමට සුදුසුකම් නොලබන 12,500 දෙනෙකුගෙන් කෙනෙක් බවයි විදෙස් මාධ්ය පෙන්වා දෙන්නේ.
2008 වසරේ දී පැවති යුදමය වාතාවරණය හමුවේ ඔහු ශ්රී ලංකාවෙන් මැලේසියාවට පළා ගොස් ඇත්තේ ඔහුගේ බිරිඳ ද සමගයි.
අනතුරුව 2012 වසරේ දී, ඔහුගේ මාස අටක ගැබිනි බිරිඳ සහ දරුවන් දෙදෙනා සමඟ, පැරා ඉන්දුනීසියාව හරහා ඕස්ට්රේලියාවේ ක්රිස්මස් දූපතට බෝට්ටුවකින් ගමන් කර තිබුණා.
අනතුරුව එම පවුල ඩාවින්හි රැඳවුම් මධ්යස්ථානයක කාලය ගත කළ අතර, පසුව 2013 සැප්තැම්බර් මාසයේදී බ්රිජිං වීසා (bridging visa) මත ඔවුන් බැලරට් වෙත මුදා හැර තිබෙනවා.
පැරාට මාස හතරක් බ්රිජිං වීසා මත ආරක්ෂාව සඳහා වූ ඔවුන්ගේ අයදුම්පත ප්රතික්ෂේප වන තෙක් සහ ඔවුන්ගේ වීසා බලපත්රය අවලංගු කරන තෙක් රැකියාවක නිරත වීමට හැකියාව පැවතුණා.
අදාළ වීසා ප්රතික්ෂේප කිරීමට එරෙහිව අභියාචනා ඉදිරිපත් කරන අතර වසර නවයකට ආසන්න කාලයක් කුලී ගෙවීමට සහ බිල්පත් ආවරණය කිරීමට ඔවුන්ට හැකියාව ලැබී ඇත්තේ ප්රජා සාමාජිකයින් හේතුවෙන්.
පැරා පවසා ඇත්තේ වෛද්ය ප්රතිකාර ලබා ගැනීමට නොහැකි වීමේ අවධානම හේතුවෙන් තම දරුවන්ට ඔවුන්ගේ ළමා කාලය ද අහිමි වූ බවයි.
තුවාල වීමේ අවදානමක් ඇති දේවල් කිරීමට තම බිරිඳ දරුවන්ට ඉඩ නොදී ආරක්ෂා කළ බව ද මෙම පුද්ගලයා පෙන්වා දී තිබෙනවා.
ඔවුන්ගේ බාල දියණිය දැන් ඕස්ට්රේලියානු පුරවැසිභාවය ලබා තිබුණ ද මෙම පවුල ඕනෑම අවස්ථාවක පිටුවහල් කිරීමට මුහුණ දීමේ හැකියාව පවතින බවයි විදෙස් මාධ්ය පෙන්වා දෙන්නේ.
ඔස්ට්රේලියාවේ ස්වදේශ කටයුතු දෙපාර්තමේන්තුවේ ප්රකාශකයෙකු ප්රකාශයක් නිකුත් කරමින් කියා සිටියේ මෙවැනි සිදුවීම් පිළිබඳ අදහස් දැක්වීමක් සිදු නොකරන බවයි.
