තායිවාන සමුද්‍ර සන්ධිය අධීක්‍ෂණයට ලක්වන නැගෙනහිර විධානයට අයත් කඳවුරක් වෙත චීන ජනාධිපති ෂී ජින්පින්ග් මෑතකදී කළ සංචාරය, තායිවානයට ප්‍රහාරයක් එල්ල වුවහොත් එක්සත් ජනපදය සහ ජපානය මැදිහත් වනු ඇති බවට චීනයේ ඇති විශ්වාසය පෙන්නුම් කරන බව දේශපාලන විචාරකයින් පවසනවා.
චීන මධ්‍යම හමුදා කොමිසමේ සභාපතිවරයා ද වන ෂී, නැගෙනහිර ජියැන්ග්සු පළාතේ නැන්ජිං හි අණදෙන මූලස්ථානයට ගිය අවස්ථාවේ චීනයේ ස්වෛරීභාවය සහ ජාතික සමගිය ආරක්ෂා කිරීම වෙනුවෙන් එම විධානයෙන් ලැබී ඇති සැලකිය යුතු දායකත්වය ප්‍රශංසාවට ලක් කර තිබුණා.
ඔහු මහජන විමුක්ති හමුදාවේ අණ දෙන නිලධාරීන්ගෙන් ඉල්ලා සිටියේ විය හැකි අවදානම් පිළිබඳව අවදියෙන් සිටින ලෙසයි.
ලොව මුහුණ දෙමින් සිටින පරිවර්තනයේ නව කාල පරිච්ඡේදය සමඟ ප්‍රාන්තයේ ආරක්ෂක තත්ත්වය වැඩි වශයෙන් අස්ථාවර සහ අවිනිශ්චිත බවට ඔහු අනතුරු අඟවා තිබෙනවා.
මයික් රොජර්ස්ගේ නායකත්වයෙන් යුත් එක්සත් ජනපද කොන්ග්‍රස් නියෝජිත පිරිසක් තායිවානයේ තෙදින සංචාරයක නිරත වී සතියකටත් අඩු කාලයකදී චීන ජනාධිපතිවරයා මෙම සංචාරය සඳහා පැමිණ ඇති බව ෂැංහයි දේශපාලන විද්‍යාව සහ නීතිය පිළිබඳ ෂැංහයි විශ්වවිද්‍යාලයේ මහාචාර්ය නි ලෙක්ෂියොන්ග් පෙන්වා දෙනවා.
තායිවානය සමඟ ඒකාබද්ධ හමුදා අභ්‍යාස සහ දිවයිනේ හමුදාවන් පුහුණු කිරීම සඳහා බලය පැවරීමේ පනතක් එක්සත් ජනපද ජාතික ආරක්ෂක සභාව සහ සෙනෙට් සභාව යන දෙකම මගින් අනුමත කිරීමෙන් දින කිහිපයකට පසුවයි ඔවුන් ද එම සංචාරයේ නිරත වී තිබුණේ.
කොංග්‍රස් කණ්ඩායමේ තායිවාන සංචාරය බීජිං වෙත වැඩි පීඩනයක් එල්ල කරන අතර එය තායිවාන යුද්ධයකදී වොෂින්ටනයේ මිලිටරි මැදිහත්වීම තීව්‍ර කරන බව චීන ජනාධිපතිවරයාට මතක්කර දීමක් ද වන බවයි මහාචාර්ය නි පවසන්නේ.
කෙටි කාලීන හා දිගු කාලීන යුද්ධය සඳහා සූදානම් වීමට එක්සත් ජනපදය ද දැනට පවතින යුක්රේන යුද්ධයෙන් ඉගෙන ගෙන ඇති බැවින් චීන ජනාධිපතිවරයාට දැඩි අනතුරක් දැනෙනු ඇති බවත් ඒ අනුව තව තවත් පතොරම් සහ බර අවි පද්ධති තායිවානය වෙත යෙදවීමට ඉඩ ඇති බවත් ඔහු පෙන්වා දෙනවා.
නැගෙනහිර විධානය මගින් තායිවාන සමුද්‍ර සන්ධියේ සටන් සූදානම් වෙනුවෙන් නිරන්තර අභ්‍යාස සිදුකරන අතර මෑත මාසවල දී තායිවානය වට කරමඅන් සජීවී-ගිනි සරඹ කිහිපයක්ද පවත්වා තිබුණා.
බීජිං හි යුආන් වැන්ග් චින්තන පර්ෂදය සමඟ පර්යේෂණ සිදුකරන පර්යේෂකයෙකු වන ෂෝ චෙන්මිං පෙන්වා දෙන්නේ පසුගිය අගෝස්තුවේ හිටපු එක්සත් ජනපද කථානායක නැන්සි පෙලෝසි තායිපේ වෙත ගිය පසු චීන ජනාධිපතිවරයා නැගෙනහිර විධානයේ සිදුකළ පළමු නිරීක්ෂණ චාරිකාව මෙය බවයි.
ඊට ප්‍රතිචාරයක් ලෙස භටයන් පෙර නොවූ විරූ අභ්‍යාස පැවැත්වූ බව ඔහුගේ මතයයි.
කෙසේ වෙතත් බොහෝ රටවල් මෙන්, එක්සත් ජනපදය ද තායිවානය ස්වාධීන රාජ්‍යයක් ලෙස පිළි නොගන්නා නමුත්, එම දිවයිනේ ප්‍රබල ආධාරකරුවෙකු ලෙස රැඳී සිටිනවා.
