පාකිස්ථාන ක්‍රිකට් කණ්ඩායමට එක්දින ලෝක කුසලාන සඳහා සහභාගීවීමට අනුමැතිය ලබාදීම සම්බන්ධයෙන් සොයාබැලීමට ඉහළ පෙළේ කමිටුවක් පත්කර තිබෙනවා.
පාකිස්ථාන අග්‍රාමාත්‍යවරයා විසින් මෙම කමිටුව පත්කර ඇති අතර, විදේශ අමාත්‍ය බිලාවල් භූතෝ, අභ්‍යන්තර කටයුතු අමාත්‍ය රනා සනාවුල්ලා, නීතිය හා අධිකරණ අමාත්‍ය අසාම් නසීර් සහ පාකිස්ථානයේ බුද්ධි අංශ ප්‍රධානීන් කිහිප දෙනෙක් මෙම කමිටුවට ඇතුළත්.
පාකිස්ථාන කණ්ඩායමේ ඉන්දීය සංචාර සැලසුම් කිරීම පිළිබඳ නිර්දේශ ඉදිරිපත් කිරීම මෙම කමිටුවේ ප්‍රධාන කාර්යය වී තිබෙනවා.
එළඹෙන ඔක්තෝම්බර් මාසයේ ඉන්දියාවේ දී පැවැත්වෙන එක්දින ක්‍රිකට් ලෝක කුසලානය සඳහා සහභාගීවීමට පාකිස්ථාන ක්‍රිකට් කණ්ඩායම, එරට අග්‍රාමාත්‍ය ෂෙබාස් ෂරීෆ්ගෙන් සහ රජයේ තවත් අංශ කිහිපයකින් අවසර ඉල්ලා ලිඛිතව ඉල්ලීම්කර තිබුණා.
පාකිස්ථානය සහ ඉන්දියාව අතර පවතින දේශපාලනික පසමිතුරුකම් හේතුවෙන් පාකිස්ථාන ක්‍රිකට් කණ්ඩායමට ඉන්දියාව බලා යෑමට පාකිස්ථාන රජයෙන් අවසර ලබාගත යුතු වනවා.
මේ අතර තමන් ඇතුළු කණ්ඩායම ඉන්දියාවේ ඕනෑම ස්ථානයක තරග කිරීමට සූදානම් බව පාකිස්ථාන ක්‍රිකට් නායක බාබර් අසාම් පවසා තිබුණා.
