ඉපලෝගම ඉඳිගහවැව ප්‍රදේශයේ ගෙවත්තක ඇති වගා ළිඳකින් අබිරහස් ලෙස මිය ගිය පුද්ගලයකුගේ මළ සිරුරක් හමුවී තිබෙනවා.
පුද්ගලයෙකු අතුරුදහන් වීමක් සම්බන්ධයෙන් ඊයේ (01) ඉපලෝගම පොලිස් ස්ථානයට ඔහුගේ ඥාතීන් කළ පැමිණිල්ලකට අනුව සිදු කළ විමර්ශනයකදී ප්‍රදේශවාසීන්ගෙන් ලැබුණු තොරතුරකට අනුවයි අදාළ මළ සිරුර සොයාගෙන ඇත්තේ.
මෙලෙස මිය ගොස් ඇත්තේ තිරප්පනය කුඩාවැව ප්‍රදේශයේ පදිංචිව සිටි 29 හැවිරිදි තරුණයෙක්.
ඔහු දඹුල්ල බස් නැවතුම්පලේ වේලා සටහන්කරුවකු ලෙස රැකියාව කළ අයෙක්.
මිය ගිය පුද්ගලයා පෙරදින රාත්‍රියේ ඉඳිගහවැව ප්‍රදේශයේ පැවැති නාට්‍ය සංදර්ශණ මාලාවක් නැරඹීම සදහා කුඩාවැව ප්‍රදේශයේ පිහිටි නිවසින් පිටත්ව ගොස් තිබෙනවා.
ඉඳිගහවැව ක්‍රීඩා පිටියක පැවති නාට්‍ය සංදර්ශණය නැරඹීමට පැමිණ ඇති ඔහු එදින මධ්‍යම රාත්‍රී වන තෙක් එම ස්ථානයේ රැඳී සිට ඇති බවයි සිදු කළ පොලිස් විමර්ශණ වලදී අනාවරණය වී ඇත්තේ.
ඔහු පසුදින (01) සවස් වන තෙක් යළි නිවසට නොපැමිණිම සම්බන්ධයෙන් නිවැසියන් පොලිසියට පැමිණිලි කර තිබුණා.
ඒ අනුවයි ඉපලෝගම පොලිස් ස්ථානය මගින් විමර්ශණ ආරම්භ කර තිබුණේ.
එහිදී ප්‍රදේශවාසින්ගෙන් ලැබුණු තොරතුරකට අනුව නාට්‍ය සංදර්ශණ මාලාව පැවැති ක්‍රීඩාංගනය අසල නිවසක තිබූ වගා ළිඳක තිබියදී මළ සිරුර සොයා ගෙන තිබෙනවා.
මෙම සැක කටයුතු මරණය සම්බන්ධයෙන් මහේස්ත්‍රාත් පරීක්ෂණයෙන් පසු සිරුර පශ්චාත් මරණ පරීක්ෂණය සඳහා අනුරාධපුර ශික්ෂණ රෝහලට යොමු කරනු ලැබුවා.
මෙම මරණය ඝාතනයක් ද, සියදිවි නසා ගැනීමක් එසේ නැතහොත් අනතුරකින් සිදුවූවක් ද යන්න මෙතෙක් නිශ්චිතව අනාවරණය වී නැහැ.
සිද්ධිය සම්බන්ධයෙන් පොලිස් පරීක්ෂණ ක්‍රියාත්මකයි.
