අනවසර ගිනි අවි සහ අත්බෝම්බ සම්බන්ධයෙන් ඔත්තු ලබාදෙන පුද්ගලයන් සඳහා පොලිස් ත්‍යාග යෝජනා ක්‍රමය යටතේ පිරිනමන ත්‍යාග මුදල වැඩි කිරීමට පොලිසිය තීරණය කර තිබෙනවා.
සියලුම පොලිස් ප්‍රධානීන් වෙත ලිපියක් නිකුත් කරමින් පොලිස්පතිවරයා අවධාණය කර ඇත්තේ පසුගිය කාලසීමාව තුළ වාර්තා වූ ඇතැම් අපරාධ මගින් නීති විරෝධී ගිනි අවි සහ අත් බෝම්බ දිවයින තුළ සංසරණය වන බවට නිරීක්ෂණය වන අතර මෙම තත්ත්වය ජනතාවට අපරාධ බියකින් තොරව ජීවත් විය හැකි සාමකාමී පරිසරයක් බිහි කිරීමට බාධාවක් බවයි.
එබැවින් මෙම නීති විරෝධී ගිනි අවි සහ අත් බෝම්බ සෙවීමේ මෙහෙයුම් තවදුරටත් වැඩි කළ යුතු අතර ඒ සඳහා සියලු පොලිස් නිලධාරීන් සහ පෞද්ගලික ඔත්තුකරුවන් දිරි ගැන්වීමට පොලිස් ත්‍යාග උරමුදල් ගෙවීම මාසයක කාලයක් සඳහා වැඩි කිරීමටයි තීරණය කර ඇත්තේ.
මූලික පියවර ලෙසට මෙම ත්‍යාග ඹුදල් ගෙවීම අද සිට ලබන ජුලි මස 31 වනදා දක්වා කාලය තුළ සිදු කරන වැටලීම්වලදි අත්අඩංගුවට ගනු ලබන නීති විරෝධී ගිනි අවි සහ අත් බෝම්බ සඳහා අදාළ වනු ඇති.
