නීති විරෝධී ලෙස රත්රන් සහ ජංගම දුරකථන තොගයක් රැගෙන ඒම සම්බන්ධයෙන් චෝදනා එල්ලවූ පුත්තලම් දිස්ත්රික් පාර්ලිමේන්තු මන්ත්රී අලි සබ්රි රහීම්ට එරෙහි යෝජනාවක් විපක්ෂයේ මන්ත්රීවරුන් පිරිසක් අද කථානායකවරයාට භාරදී තිබෙනවා.
අදාළ යෝජනාව කතානායකවරයා වෙත භාරදෙනු ලැබුවේ සමගි ජන බලවේගයේ මහ ලේකම් රංජිත් මද්දුම බණ්ඩාර, කාවින්ද ජයවර්ධන, ජේ.සී. අලවතුවල ඇතුළු මන්ත්රී කණ්ඩායමක් විසින්.
දයාසිරි ජයසේකර, හර්ෂණ රාජකරුණා, උදය ගම්මන්පිල, වසන්ත යාපා බණ්ඩාර, වීරසුමන වීරසිංහ, අශෝක් අබේසිංහ, ඉමිතියාස් බාකීර් මාකර්, තුෂාර ඉඳුනිල්, උපුල් ගලප්පත්ති ඇතුලු පිරිසක් මෙම යෝජනාවට අත්සන් කර තිබෙනවා.
අදාළ යෝජනාවේ දැක්වෙන්නේ මන්ත්රීවරයා සිදු කළ ක්රියාව මගින් පාර්ලිමේන්තු මන්ත්රීවරයන් සඳහා වන චර්යා ධර්ම සංග්රහය සම්පූර්ණයෙන්ම උල්ලංඝණය කර ඇති බවයි.
පාර්ලිමේන්තු වරප්රසාද අව භාවිතා කරමින් සිදු කරනු ලැබු මෙම ක්රියාව සම්බන්ධයෙන් පාර්ලිමේන්තුව විසින් දැඩි ක්රියාමාර්ග ගත යුතු අතර ඒ සඳහා පූර්වාදර්ශයන් වුව ද අනුගමනය කළ යුතු බවයි ඔවුන් පෙන්වා දෙන්නේ.
එබැවින් පාර්ලිමේන්තු වරප්රසාදවලට මුවා වෙමින් මෙවැනි නීති විරෝධී ක්රියා තවදුරටත් සිදු නොකිරීමට මෙම පාර්ලිමේන්තු මන්ත්රීවරයාට එරෙහිව අවශ්ය පියවර කඩිනමින් ගත යුතු බවටයි මන්ත්රීවරුන් පිරිස යෝජනා කර ඇත්තේ.
