අභාවප්‍රාප්ත ප්‍රවීණ රංගන ශිල්පී ජී. ආර්. පෙරේරා මහතාගේ අවසන් කටයුතු අද පස්වරුවේ සිදු කෙරුණා. ඒ බොරැල්ල පොදු සුසාන භූමියේදීයි.
කාලයක් අසනීප තත්ත්වයකින් පසු වූ ප්‍රවීණ රංගන ශිල්පියා පසුගිය පළමුවනදා අභාවප්‍රාප්ත වුණා. මියයන විට ඔහුගේ වයස අවුරුදු 84ක්.
“බෝඩිං කාරයෝ” වේදිකා නාට්‍යයෙන් රංගන දිවිය ඇරඹූ ඔහු රූපවාහිනී කතා මාලා 700 කට අධික සංඛ්‍යාවක රඟපා තිබෙනවා.
1971 වසරේ වැලිකතර චිත්‍රපටයෙන් රිදී තිරයට පිවිසි ඔහු චිත්‍රපට 40 ක පමණ රඟපා ඇති අතර අවසන් වරට 2018 වසරේ නිදහසේ පියා ඩී.එස් චිත්‍රපටයටද සිය රංගනයෙන් දායකත්වය ලබා දුන්නා.
ගල්හේනගේ රත්නපාල පෙරේරා නමින් පවුලේ වැඩිමලා ලෙස 1939 නොවැම්බර් 13 කිරුළපනේදී උපන් ජී. ආර්. පෙරේරා
බොරලැස්ගමුව එගොඩවත්ත ප්‍රදේශයේ යි පදිංචිව සිටියේ.
ඔහුගේ බිරිඳ ටෙලිනාට්‍ය නිෂ්පාදකවරියක්.
මෙම යුවළට දියණියන් දෙදෙනෙක් සහ එක් පුතෙක් සිටි අතර ඔහුගේ බාල දියණිය යමුනා එරන්දතී ද ටෙලිනාට්‍ය නිළියක්.
ඔහු නාට්‍යය ක්ෂේත්‍රයට හඳුන්වා දුන්නේ ඔහුගේ සමීප මිතුරෙකු වූ කීර්තිමත් නාට්‍යකරුවෙකු වූ තිස්ස අබේසේකරයි.
අබේසේකර, ජී. ආර්. ඇතුළු පිරිසක් සමගින් “අපේ කට්ටිය”නමින් සුගතපාල ද සිල්වාගේ නාට්‍ය කණ්ඩායමක් ද පිහිටුවා තිබුණා.
ජී.ආර් ගේ පළමු රංගනය වූ බෝඩිං කාරයෝ 1961 වසරේ රාජ්‍ය නාට්‍ය උළෙලේ හොඳම නාට්‍යය සඳහා වන සම්මානය ද දිනා ගනු ලැබුවා.
