උඩරට වතුකරය ආශ්‍රිත ප්‍රදේශවලට මේ දිනවල සවස් කාලයේ පවතින අධික වර්ෂාව සහිත අයහපත් කාලගුණික තත්ත්වය හේතුවෙන් කඳපොල ප්‍රදේශයේ එළවළු වගා බිම් රැසක් ගංවතුර තර්ජනයට ලක්වීමෙන් විනාශයට පත්ව ඇතැයි කඳපොල ප්‍රදේශයේ එළවළු ගොවීහු පවසන බව අප වාර්තාකරු දන්වා සිටියා.
ඊයේ (30) දිනයේද සවස් කාලයේ පැවති අධික වර්ෂාව හේතුවෙන් එළවළු වගා බිම් හා උඩුපුස්සැල්ලාව- නුවරඑළිය මාර්ගයද ජලයෙන් යටවී පැවැති බවද ගොවීහු පවසා තිබෙනවා.
කඳපොල නගරය හා ඒ ආශ්‍රිත ප්‍රදේශවල පහත් බිම්වල මෙන්ම ඇලවල් හා ඔයවල් ආශ්‍රිත වගා කොට තිබු උඩරට එළවළු වගා බිම් රැසක් මෙසේ ජලයෙන් යටවීම හේතුවෙන් එම වගා බිම්වල වගා කොට තිබු ලීක්ස්, අර්තාපල්, බිට්රූට්, නෝකෝල්, සලාද, මාළු මිරිස්, රාබු ඇතුළු උඩරට එළවළු වර්ග රැසක් විනාශයට පත්ව තිබෙනවා.
ඇතැම් එළවළු වගා බිම් සම්පුර්ණයෙන්ම විනාශයට ලක්ව ගොස් ඇති බවත්, දැඩි දුෂ්කරතා මැද්දේ බැංකු ණය මුදල් ලබා හා කණකර ආභරණ උකසට තබා ඉතාමත් අසීරුවෙන් වගා කොටගත් තම වගා බිම් මෙසේ ජලයෙන් යටවී විනාශයට පත් වීම මගින් තමන් කබලෙන් ලිපට ඇද වැටුණු තත්ත්වයට පත්ව ඇතැයි කඳපොල එළවළු ගොවිහු වැඩිදුරටත් පවසා සිටිනවා.
උඩුපුස්සැල්ලාව – නුවරඑළිය මාර්ගයද පසුගිය දින කීපයේ පැවති වර්ෂාව හේතුවෙන් ජලයෙන් යටවී රථ වාහන ගමනාගමනයට බාධා එල්ලව තිබූ බව ද කඳපොල වැසියෝ අප වාර්තාකරු හා පවසා තිබෙනවා.
