“ගමෙන් කොළඹට” විශේෂ අවුරුදු ප්‍රවාහන සේවා වැඩසටහන ලබන 18 වනදා දක්වා ක්‍රියාත්මක බව ලංකා ගමනාගමන මණ්ඩලය සඳහන් කරනවා.
ඒ, අනුව ගම්බිම් බලා ගොස් යළි නගරය වෙත පැමිණෙන මගී ජනතාව වෙනුවෙන් හෙට (17) සිට ලංගම බස් රථ 4500ක් ධාවනයට යොදවන බවයි එම මණ්ඩලය සඳහන් කළේ.
මේ අතර අද (16) දිනයේ ද ජනතාවට ප්‍රමාණවත් ප්‍රවාහන පහසුකම් සැපයීම සඳහා අවශ්‍ය පියවර ගත් බව ජාතික ගමනාගමන කොමිසම පවසනවා.
කෙසේ වෙතත් කොළඹ ඇතුළු තදාසන්න ප්‍රදේශවලට පැමිණෙන ජනතාව චෝදනා කළේ ප්‍රමාණවත් ප්‍රවාහන පහසුකම් නොමැතිවීම හේතුවෙන් තමන් දැඩි අපහසුතාවයකට පත්වන බවයි.
අලුත් අවුරුදු නිවාඩු ලබා සිටි ඇතැම් රියදුරන් සේවයට වාර්තා නොකිරීම හේතුවෙන් අද (16) උදෑසන කාලයේ සිට දුම්රිය ගමන්වාර 30කට වැඩි සංඛ්‍යාවක් අවලංගු කිරීමට සිදුව තිබෙනවා.
