මෙවර අයි.පී.එල් තරගාවලිය තුළ සිය පිත්තේ රිද්මය සොයමින් සිටි ලක්නව් සුපර්ජයන්ට්ස් කණ්ඩයමේ නායක ලෝකේශ් රාහුල්ට සිය සුපුරුදු රිද්මයට පැමිණීමට ඊයේ (15) හැකියාව ලැබුණා.
පන්ජාබ් කිංග්ස් සමඟ ඊයේ රාත්‍රියේ පැවති තරගයේ දී පන්දු 56ක් තුළ ලකුණු 74ක් රැස්කරමින් වාර්තා පොත් අලුත් කිරීමට ද ඔහුට හැකියාව ලැබීමට විශේෂත්වයක්.
ඒ, අයි.පී.එල් පිටිය තුළ අඩුම තරග සංඛ්‍යාවක දී ලකුණු 4,000 සීමාව පසුකළ පිතිකරුවා බවට පත්වෙමින්.
ලෝකේශ් රාහුල් ඊයේ රැස්කළ ලකුණු 74ත් සමඟ මේ වනවිට අයි.පී.එල් පිටිය තුළ ලකුණු 4,044ක් ලබාගෙන ඇත්තේ සාමාන්‍ය 47.02ක් සහ 135.16ක ප්‍රහාරාත්මක වේගයක් රඳවා ගනිමින්.
අයි.පී.එල් පිටියේ ලකුණු 4,000 සීමාව පසුකර යෑමට රාහුල් ක්‍රීඩාකර ඇති ඉනිම් සංඛ්‍යාව 105ක්.
මීට පෙර අයි.පී.එල් පිටියේ ලකුණු 4,000 සීමාව පසුකර යෑමට අඩුම ඉනිම් සංඛ්‍යාවක් ක්‍රීඩාකර ඇති ක්‍රීඩකයින් අතර, ක්‍රිස් ගේල් (ඉනිම් 112), ඩේවිඩ් වෝනර් (ඉනිම් 114), විරාත් කෝලි (ඉනිම් 128) සහ ඒබී ඩිවිලියර්ස් (ඉනිම් 131) වැනි ක්‍රීඩකන් පෙරමුණේ පසුවනවා.
ලෝකේශ් රාහුල් අයි.පී.එල්. ඉතිහාසයේ 14 වැනි වැඩිම ලකුණු ලාභියා ද වනවා.
