විදේශීය සංචාරකයින්ගේ ආරක්ෂාව සඳහා භාෂා 7 කින් සමන්විත නව සංචාරක ජංගම යෙදවුමක් (app) හඳුන්වා දෙන බව සංචාරක අමාත්‍ය හරීන් ප්‍රනාන්දු මහතා පවසනවා.
අමාත්‍ය ප්‍රනාන්දු කියාසිටියේ ජංගම යෙදවුම මඟින් සියලුම ත්‍රිරෝද රථ ලියාපදිංචි කරන අතර විදේශීය සංචාරකයින්ට ස්කෑන් කිරීම සඳහා වාහනයේ කේතයක් ප්‍රදර්ශනය කරන බවයි.
පොලිසිය විසින් අදාළ යෙදවුම නිරීක්ෂණය කර කිසියම් සිදුවීමක් සිදුවුවහොත් නීතිමය පියවර ගන්නා බව ඔහු සඳහන් කළා.
ඇතැම් සංචාරක ප්‍රදේශවල විදේශිකයන් රැගෙන යන ත්‍රිරෝද රථ රියදුරන්ට හිරිහැර කිරීම සම්බන්ධයෙන් දිගින් දිගටම සිදුවන සිදුවීම් හේතුවෙන් මෙම පියවර ගන්නා බව සංචාරක අමාත්‍යවරයා කියා සිටියා.
මෙම ජංගම යෙදවුම තුළ දේශීය සංචාරක කර්මාන්තයේ පාර්ශවකරුවන් කිහිප දෙනෙකුගේ සහභාගීත්වයෙන් ශ්‍රී ලංකාවේ සංචාරක ආකර්ෂණ ස්ථාන සහ රටේ සංචාරක හෝටල් පිළිබඳ විස්තර ද ඇතුලත් කර තිබෙනවා.
විදේශීය සංචාරකයින්ගේ පහසුව සඳහා ජංගම යෙදවුමට ගෙවීම් පද්ධතියක් ද ඇතුළත් කර ඇති බවයි සංචාරක අමාත්‍යවරයා වැඩිදුරටත් සඳහන් කළේ.
අමාත්‍ය හරීන් ප්‍රනාන්දු මහතා පැවසුවේ මෙම නව යෙදවුම මාර්තු මස පළමු සතියේදී එළිදැක්වීමට නියමිත බවයි.
සංචාරක ක්ෂේත්‍රයේ ඉදිරි සැලසුම් ද හෙළි කළ අමාත්‍යවරයා සංචාරක ව්‍යාපාරය ප්‍රවර්ධනය කිරීම සඳහා ජාත්‍යන්තර ක්‍රීඩා ඉසව් කිහිපයක් ශ්‍රී ලංකාවේ පැවැත්වීමට සූදානම් වන බව අනාවරණය කළා.
