දෙවන ඒකාබද්ධ මාර්ග ආයෝජන වැඩසටහන යටතේ ආරම්භ කෙරුණු බදුල්ල- ස්ප්රිංවැලි මාර්ගයේ වීරියපුර, බිෂොප් නිල නිවාස මාර්ගය දක්වා කොටස සංවර්ධනය කිරීම සඳහා වැඩ කටයුතු ආරම්භ වූයේ 2018 වසරේ ජූලි මාසයේදීයි.
ආසියානු සංවර්ධන බැංකු ණය පහසුකම් මත ක්රියාත්මක මෙම ව්යාපෘතිය සඳහා ඇස්තමේන්තු ගතකර තිබූ මුදල රුපියල් මිලියන 13.6ක්.
මෙම මාර්ගයේ සංවර්ධන කටයුතු වසර දෙකක් තුළ අවසන් කිරීමට නියමිත තිබූ අතර, මේ වන විට ව්යාපෘතිය ආරම්භ කොට වසර හතරකට වැඩි කාලයක් ඉක්මව ගොස් ඇතත් මේ වන තෙක්ම එහි ඉදිකිරීම් අවසන් කර නොතිබීම කණගාටුවට කරුණක්.
මෙම මාර්ගයේ ජනතාවට ගමන් කළ හැකි පරිදි නඩත්තු කටයුතු කිරීමට මාර්ගය සංවර්ධ අධිකාරිය, අවස්ථා කිහිපයකදීම අයි රෝඩ් ව්යාපෘති නිළධාරීන්ගෙන් අවසර ඉල්ලා තිබුන ද එයට මේ වන තෙක් ඉඩ ලබාදීමක් සිදුකර නැහැ.
මේ අතර ඒකාබද්ධ මාර්ග ආයෝජන වැඩසටහනේ පළාත් අධ්යක්ෂක (වැඩ බලන) ලෙස කටයුතු කරන එම්.එම්.ජී.කේ. මුහන්දිරම්ගෙන් මේ පිළිබදව කළ විමසීමක දී පැවසුවේ මෙවැන්නක්.
“මෙම මාර්ගයේ මුල්ම කොන්ත්රාත් සමාගමේ ඇති වූ ගැටලුවක් නිසා ඒ අය මාර්ගයේ වැඩ අතර මඟ දාලා යන්න ගියා. ඉන් පසුව නැවත වරක් දෙවන ටෙන්ඩරය ඉදිරිපත් කරමින් වෙනත් සමාගමකට මාර්ගයේ ඉදිකිරීම් කිරීමට භාරදුන්නා. ඔවුන් එහි වැඩ කටයුතු කරගෙන යන විටයි ආසියානු සංවර්ධන බැංකු ණය ලබාදීම නැවතුනේ. ඒ හේතුවත් එක්ක ඉදිකිරීම් සමාගමට ගෙවීම් කරන්න විදිහක් නැතිවුණා. ඒ හේතුවෙන් තමයි මේ මාර්ගයේ සංවර්ධනය නතර වුණේ. කොයි මොහොතේ හෝ මුදල් ලැබුනොත් අපි මාර්ගයේ වැඩ පටන්ගන්නවා.”
වගකිවයුතු බලධාරී කෙසේ පැවසුවත් මාර්ගයේ සංවර්ධන කටයුතු මෙලෙස අතර මඟ නවතා දැමීම හේතුවෙන් එම මාර්ගය භාවිත කරන පුද්ගලයින්ට ගැටළු රැසකට මුහුණ පෑමට සිදුව තිබෙනවා.
මෙම මාර්ගය භාවිත කරන මහජනතාව ඉල්ලා සිටින්නේ නතරකර ඇති සංවර්ධන කටයුතු හැකි ඉක්මනින් ආරම්භ කර මාර්ගය ගමනා ගමනයට පහසු ලෙස සකසා දෙන ලෙසයි.
