ඌව පරණගම කරගහඋල්පත ප්‍රදේශයේ දී වයස අවුරුදු නවයක පිරිමි දරුවෙකු නිවසේ පසෙක අසුරා තිබූ වැලි කොට්ට පෙරළී යාමෙන් මියගොස් තිබෙනවා.
ඊයේ (12) සවස 6.30ට පමණ ,නිවැසියන් බැහැරව සිටි අවස්ථාවක මෙම මරණය සිදුවී ඇති බවයි අප වාර්තාකරුවන් සඳහන් කළේ.
නිවස ආසන්නයේ බිත්තියකට හේත්තු කරමින් අසුරා තිබූ වැලි බෑග් තොගයක්, ළමයාගේ ඇඟට වැටී මෙම අවාසනාවන්ත මරණය සිදු වන්නට ඇති පොලිසිය සැක පළ කරනවා.
මියගිය දරුවාගේ මව එදින සවස 6.30ට පමණ නිවසට පැමිණ බලන විට දරුවා වැලිගොඩ අසල වැටී සිටින ආකාරය දැක ඇති අතර, අනතුරුව දරුවා ඌවපරණගම රෝහලට ඇතුළත් ඇතුළත් කිරීමට යන අතරමගදී මියගොස් ඇති බවයි වාර්තා වන්නේ.
සිද්ධිය සම්බන්ධයෙන් අද පෙරවරුවේ බණ්ඩාරවෙල විශේෂ අපරාධ විමර්ශන ඒකකය අදාළ ස්ථානයේ ස්ථානිය පරීක්ෂණයක් ද සිදු කළ අතර, වැලිමඩ වැඩබලන මහේස්ත්‍රාත්වරයා ස්ථාන පරීක්ෂණයක් ද සිදු කර තිබෙනවා.
වැඩිදුර පරීක්ෂණ සඳහා මෘත ශරීරය ඌවපරණගම රෝහලේ සිට දියතලාව මහ රෝහලට යොමු කර ඇති අතර සිද්ධිය සම්බන්ධයෙන් ඌවපරණගම පොලිසිය වැඩිදුර පරීක්ෂණ සිදු කරනවා.
