නීති විරෝධී ලෙස මෙරටින් විදෙස් රටකට පුද්ගලයන් සංක්‍රමණය කර රැකියා ලබා දෙන බව පවසා මුදල් ලබාගත් මිනිස් ජාවාරම්කරුවන් බවට සැකකෙරෙන පුද්ගලයන් දෙදෙනෙකු අත්අඩංගුවට ගෙන තිබෙනවා.
ශ්‍රී ලංකා නාවික හමුදාව, පොලිසිය සමග එක්ව පසුගියදා මීගමුව ප්‍රදේශයේ සිදුකල විශේෂ සෝදිසි මෙහෙයුමකදී යි මෙම සැකකරුවන් දෙදෙනා අත්අඩංගුවට ගෙන ඇත්තේ.
නාවික හමුදා බුද්ධි අංශයට ලද තොරතුරකට අනුව, මීගමුව පොලිසිය හා එක්ව පසුගිය 4 වනදා සවස මීගමුව ප්‍රදේශයේ සිදුකළ මෙම විශේෂ සෝදිසි මෙහෙයුමේදී, සැකකටයුතු මෝටර් රථයක් පරීක්‍ෂාවට ලක් කර තිබෙනවා.
එහිදී, මෙරටින් විදෙස් රටකට නීති විරෝධී ලෙස මිනිසුන් සංක්‍රමණය කරවා රැකියා ලබා දෙන බව පවසා පුද්ගලයන් 20 දෙනෙකුගෙන් රුපියල් මිලියන 5කට අධික මුදලක් ලබාගත් මිනිස් ජාවාරම්කරුවන් බවට සැකකෙරෙන පුද්ගලයන් දෙදෙනෙකු සමඟ එම මෝටර් රථය අත්අඩංගුවට ගනු ලැබුවා.
වයස අවුරුදු 30 සහ 41 යන වයසේ පසුවන සැකකරුවන් හලාවත සහ කිලිනොච්චිය ප්‍රදේශවල පදිංචිකරුවන් බවටයි හඳුනාගෙන ඇත්තේ.
එම සැකකරුවන් දෙදෙනා සහ මෝටර් රථය ඉදිරි නීතිමය කටයුතු සඳහා මීගමුව පොලිසිය වෙත භාර දීමට පියවර ගෙන තිබෙනවා.
මෙවැනි මිනිස් ජාවාරම් වලට හසුවී, නීති විරෝධී ලෙස මෙරටින් සංක්‍රමණය වීමට උත්සහ කර, නීතිය ඉදිරියේ වරදකරුවෙකු වීමෙන් වළකින ලෙසටයි නාවික හමුදාව අවධාරණය කරන්නේ.
