ජීව උණ්ඩ සමග ඇමරිකානු ජාතිකයෙක් ගුවන්තොටුපලේදී අත්අඩංගුවට

කටුනායක ගුවන්තොටුපලින් විදෙස්ගත වීමට පැමිණි ඇමරිකානු ජාතිකයෙකුගේ ගමන් මල්ලේ තිබී මිලිමීටර් 9 වර්ගයේ ජීව උණ්ඩ සහ මැගසිනයක් අත්අඩංගුවට ගෙන තිබෙනවා.

තම ශ්‍රී ලංකා සංචාරය අවසන් කරමින් යළි සිය රට බලා යාමට පැමිණි ඇමරිකානු ජාතිකයෙකුගේ ගමන් මල්ලේ තිබී මෙම උණ්ඩ ඊයේ රාත්‍රී ගුවන්තොටුපල පොලිසිය විසින් සොයාගෙන ඇති බවයි අප වාර්තාකරු කියාසිටියේ.

ඇමෙරිකාවේ ටැක්සි රථ රියැදුරෙක් ලෙස කටයුතු කරන ඔහු 38 හැවිරිදි අයෙක්. ඔහු පසුගිය 7 වනදා ශ්‍රී ලංකාවේ සංචාරයක් සදහා පැමිණ තිබුණා.

ඔහු සිය සංචාරය නිමා කර ආපසු පිටත්ව යාම සඳහා කටුනායක ගුවන් තොටුපළ වෙත පැමිණි අවස්ථාවේ ආරක්ෂක නිලධාරීන් ඔහුගේ ගමන් මලු පරිලෝකන යන්ත්‍රයක් (Scan) ඔස්සේ පරීක්ෂා කිරීමේ දී මෙම ජීව උණ්ඩ සහ පතරොම් ගැබ සොයා ගෙන තිබෙනවා.

පසුව මේ පිළිබඳව කටුනායක ගුවන් තොටුපළ පොලිසිය දැනුවත් කර, සැකකරු අත් අඩංගුවට ගෙන තිබෙනවා.

මෙම ඇමෙරිකානු ජාතිකයා ජපන් ජාතික පෙම්වතිය සමග මාළඹේ ප්‍රදේශයේ සිටින මිතුරියකගේ විවාහ උත්සවයකට සහභාගී වීම සඳහායි පැමිණ ඇත්තේ .

ඔහු ඇමෙරිකාව තුළ ගිනි අවි භාවිතය සදහා නීතිමය අවසරය සහිත බලපත්‍රලාභියෙක් බව සඳහන්.

ඔහු ඔස්ට්‍රියාවේ නිෂ්පාදිත ග්ලොක් (Glock 43 X) වර්ගයේ පිස්තෝලයක් භාවිතා කරන අතර, ඒ සදහා භාවිතා කරන අතිරේක උණ්ඩ සහ පතරොම් ගැබ වැරදීමකින් මෙසේ සිය ගමන් බෑගයේ දමා ගෙන ශ්‍රී ලංකාවට පැමිණ ඇති බවටයි හෙළිවී ඇත්තේ.

මෙම ගිනි අවිය සහ එය භාවිතා කිරීමට ඇමරිකාව විසින් ලබා දී ඇති බලපත්‍රය මෙන්ම මෙම විවාහ මංගල උත්සවය පිළිබඳව ද කටුනායක පොලිසියේ නිලධාරීන් විසින් අන්තර්ජාලය ඔස්සේ පරීක්ෂා කර බලා තිබෙනවා.

මෙම අත් අඩංගුවට ගැනීම සිදු වන අවස්ථාවේ මෙම ඇමෙරිකානු ජාතිකයා සමග ඔහුගේ ජපන් ජාතික පෙම්වතිය ද සිටි අතර, ඇය එම අවස්ථාවේ දීම ඇමෙරිකාව බලා පිටත්ව යාමට නිදහස් කර ඇති බවයි අප වාර්තාකරුවන් සඳහන් කළේ.

සැකකරු මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.