ශීත ඍතුවේ දී පකිස්ථානයේ බටහිර මායිම්වල ත්‍රස්ත ප්‍රහාර ඉහළ යයි

ශීත සෘතුවේදී පාකිස්ථාන බටහිර කැරේස් දේශසීමාවට එල්ල වන ත්‍රස්ත ප්‍රහාරවල ඉහළ යාමක් දැකිය හැකි බව පාකිස්ථානයේ පහෙන්ජි අක්බාර් වෙබ් අඩවිය වාර්තා කරනවා.

ඔවුන් පෙන්වා දෙන්නේ සාමාන්‍යයෙන් මෙම ප්‍රහාර සිදු කරන්නේ ISIS, තලේබාන් කණ්ඩායම් වන අතර මේ වන විට එම ප්‍රහාරවලට ඇෆ්ගනිස්ථාන හමුදාද සම්බන්ධ වන බවයි.

2014 දෙසැම්බර් 16 වැනිදා  පාකිස්ථානයේ හමුදා පොදු පාසලකට ප්‍රහාරයක් එල්ල වී තිබුණා.

ශීත ඍතුවේ දීම තවත් ප්‍රහාරයක් එල්ල වී තිබුණේ බචා ඛාන් විශ්වවිද්‍යාලයටයි.

එම සිදුවීම් එරට ජනතාවගේ මතකයෙන් ගිලිහී නොමැති අතර මෙම ශීත ඍතුවේ දී ද ස්වැට්,වසිරිස්තානය, සහ ක්වෙටා ආදී ප්‍රදේශවලින් ප්‍රහාර වාර්තා වී තිබෙනවා.

මේ අතර පකිස්ථානය සහ තලේබාන් සංවිධානය අතර පසුගිය වසරේ ජුනි මාසයේදී අත්සන් තැබුණු සටන් විරාම ගිවිසුම අවසන් වී තිබෙනවා.

මෙවර ශීත ඍතුව දිගු විය හැකි බැවින්  මෙවර එය පකිස්ථානයට යහපත් නොවනු ඇති බවයි වාර්තා වන්නේ.

මෙම පසුබිම යටතේ පාකිස්තාන-ඇෆ්ගන් චමන් දේශසීමාවේ පවතින නොසන්සුන් තත්ත්වය සමනය කිරීම සඳහා පූජකවරුන්, ප්‍රාදේශීය වැඩිහිටියන් සහ වෙළඳුන්ගෙන් සමන්විත 16 දෙනෙකුගෙන් යුත් ජිර්ගා කමිටුව තහෙරික් ඊ තලේබාන් සංවිධායේ   නායකත්වය සමඟ සාකච්ඡා කිරීම සඳහා ඇෆ්ගනිස්ථානය බලා පිටත්ව ගිය බව Geo News වාර්තා කළා.

රටින් පිටවීමට පෙර මාධ්‍යවේදීන් අමතමින් මුෆ්ටි මුහම්මද් කාසිම් කියා සිටියේ ඔවුන් වෙත සාමය සහ මිත්‍රත්වයේ පණිවිඩයක් රැගෙන යන බවයි.

ඊට ඇෆ්ගන් බලධාරීන්ගෙන් ධනාත්මක ප්‍රතිචාරයක් ලැබුණු  බවද ඔහු ප්‍රකාශ කළා.

සාකච්ඡාවලින් පසුව, පවතින ආතතිය පහව යනු ඇති බවටයි ඊට එක්වන මලික් අබ්දුල් කාලික් අචක්සායි බලාපොරොත්තු වන්නේ.

කෙසේ වෙතත් පෙෂාවර්, දකුණු දිස්ත්‍රික්ක සහ මර්දාන් ප්‍රදේශය ඇතුළු ප්‍රදේශවලට මෑත කාලීනව  ප්‍රහාර වැඩිවීමෙන් පසු පොලිසිය පළාත පුරා සීරුවෙන් තැබීමට පියවර ගෙන තිබෙනවා.

Geo News වාර්තා කරන්නේ නිල සංඛ්‍යා ලේඛනවලට අනුව අගෝස්තු මැද සිට නොවැම්බර් අවසන් සතිය දක්වා අවම වශයෙන්  එම ප්‍රදේශයේ ත්‍රස්තවාදී සිදුවීම් 118 ක් වාර්තා වී ඇති බවයි.