මව්කිරිවල මයික්‍රෝ-ප්ලාස්ටික් සංඝටක ඇති බවට ඉතාලි වෛද්‍ය පර්යේෂකයින් පිරිසක් පළමු වරට හඳුනාගෙන තිබෙනවා.
ඉතාලියේ නිරෝගී මව්වරු 34 දෙනකුගෙන් ලබා ගත් මව්කිරි සාම්පල යොදාගන සිදුකළ පරීක්ෂණවලදී මෙය හඳුනා ගෙන ඇති බවයි විදෙස් මාධ්‍ය වාර්තා කරන්නේ.
පළමුවරට මයික්‍රෝ-ප්ලාස්ටික් සංඝටක සාගර ජීවීන්ගෙන් හමු වූ අතර, ඊට හේතුව ලෙස අනාවරණය වුණේ ප්ලාස්ටික් අපද්‍රව්‍ය බහුලව සාගරයට බැහැර කිරීමයි.
මව්කිරිවල මයික්‍රෝ-ප්ලාස්ටික් අඩංගු බව තහවුරු වීමෙන් මිනිස් සිරුරේ ද ප්ලාස්ටික් විෂ අඩංගුවන බවට පෙනී යන බවයි එම පර්යේෂකයින් පෙන්වා දෙන්නේ.
මිලිමීටර් 05ට අඩු දිගකින් යුත් ප්ලාස්ටික් අංශු මයික්‍රෝ-ප්ලාස්ටික් හෙවත් ක්ෂුද්‍ර ප්ලාස්ටික් ලෙස හඳුන්වනවා.
“ප්ලාස්ටික් විෂ මිනිස් සිරුරුවලින් හමුවීම බිහිසුණු තත්ත්වයක්, ඒවා සෛලවලට බලපානවා, පිළිකා ඇති කරනවා. මව්කිරිවල ප්ලාස්ටික් විෂ තිබීම කොතරම් බිහිසුණු තත්ත්වයක් දැයි අමුතුවෙන් කියන්න ඕනෑ නැහැ” යනුවෙන් මෙම පරීක්ෂණය සිදුකළ වෛද්‍ය පර්යේෂකයින් සඳහන් කර තිබෙනවා.
