මේ වනවිට දිවයිනට බලපා ඇති අයහපත් කාලගුණ තත්ත්වය හේතුවෙන් මහවැලි, කැලණි, කළු, ගිං, නිල්වල් යන ගංගාවල සහ මා ඔය සහ අත්තනගලු ඔයේ ජල මට්ටම් මේ වන විට සීඝ්‍ර ලෙස ඉහළ ගොස් ඇති බව වාරිමාර්ග දෙපාර්තමේන්තුව සඳහන් කරනවා.
ඒ හේතුවෙන් දිවයිනේ ප්‍රදේශ කිහිපයක සුළු ගංවතුර තත්ත්වයක් හටගෙන ඇති බව වාර්තා වන්නේ.
මේ හේතුවෙන් පහත් බිම්වල වෙසෙන ජනතාවගෙන් දැඩි අවදානයනේ පසුවන ලෙස ඉල්ලීමක් කරන බව වාරිමාර්ග දෙපාර්තමේන්තුව සඳහන් කළා.
මේ අතර දිස්ත්‍රික් අටක් සඳහා ජාතික ගොඩනැගිලි පර්යේෂණ සංවිධානය විසින් නායයෑම් අනතුරු ඇඟවීමේ නිවේදන නිකුත් කර තිබෙනවා.
කොළඹ, කළුතර, මහනුවර, කෑගල්ල, කුරුණැගල, මාතලේ, නුවරඑළිය, රත්නපුර යන දිස්ත්‍රික් සදහා මෙම නායයෑම් අනතුරු ඇඟවීම් නිවේදන නිකුත් කර ඇති බව සඳහන්.
එම දිස්ත්‍රික් අට අතුරින් මහනුවර, කෑගල්ල, කුරුණෑගල, නුවරඑළිය සහ රත්නපුර දිස්ත්‍රික්කවල ප්‍රාදේශීය ලේකම් කොට්ඨාශ කිහිපයකට නායයෑම් අනතුරු ඇඟවීමේ රතු නිවේදන ද නිකුත් කර ඇති බවයි ජාතික ගොඩනැගිලි පර්යේෂණ සංවිධානය වැඩිදුරටත් සඳහන් කළේ.
මේ අතර අද දිනයේත් දිවයිනේ ප්‍රදේශ කිහිපයකට මිලිමීටර් 100 ඉක්මවු තද වැසි අපේක්ෂා කළ හැකි බව කාලගුණවිද්‍යා දෙපාර්තමේන්තුව පවසනවා.
නිරිත දිග මෝසම සක්‍රීයවීමත් සමඟ මෙම වැසි සහිත කාලගුණ තත්ත්වය දිවයිනට බලපා ඇති බවයි කාලගුණවිද්‍යා දෙපාර්තමේන්තුව සඳහන් කළේ.
