මධ්‍යම කඳුකරයට තවදුරටත් තද වැසි ඇදහැලෙමින් තිබෙනවා.
ඒ හේතුවෙන් විමලසුරේන්ද්‍ර ජලාශය දිගින් දිගටම වාන් දැමීම සිදු කරන බවයි දසත ප්‍රාදේශීය වාර්තාකරු පැවසුවේ.
එමෙන්ම කාසල්රී ජලාශය ද මේ වනවිට පිටාර මට්ටමට පැමිණ තිබෙනවා.
මවුස්සාකැලේ ජලාශයේ ජල පෝෂක ප්‍රදේශයට ඇද හැලෙන වර්ෂාව හේතුවෙන් එම ජලාශය ද පිටාර ඉතා ආසන්න වෙමින් පවතින බවයි ජලාශ භාර ඉංජිනේරුවන් පැවසුවේ.
එම ජලාශ දෙකේම ජල මට්ටම ඉහළ යාමත් සමග විමලසුරේන්ද්‍ර, කැනියොන්, ලක්ෂපාන, නව ලක්ෂපාන සහ පොල්පිටිය ජල විදුලි බලාගාරවල විදුලි උත්පාදනය උපරිම ධාරිතාවෙන් සිදු කරන බව ජල විදුලි බලාගාර භාර ඉංජිනේරුවන් පැවසුවා.
මේ අතර නාච්චාදුව ජලාශයේ සියලු ම වාන් දොරටු විවර කර තිබෙනවා.
මේ අනුව තත්පරයට ගණ අඩි 2140 ක් මල්වතු ඔයට මුදා හැරෙනවා.
නාච්චදූව වැවේ වාන් දොරටු දෙකක් අඩි 2 බැගින් ද, තවත් දොරටු දෙකක් පිළිවෙළින් අඩි 03 හා 04 බැගින් ද විවර කර ඇති බවයි පැවසෙන්නේ.
මේ හේතුවෙන් මල්වතු ඔය දෙසපස පහත්බිම් හි වෙසෙන ජනතාවට දැඩි විමසිල්ලෙන් සිටින ලෙසටයි දැනුම්දී තිබෙනවා.
