ගල්කිරියාගම වනසත්ත්ව අඩවියට අයත් ගල්කිරියාගම – බණ්ඩාරපොතාන ප්‍රදේශයේ යායක තිබූ අනාරක්ෂිත වගා ළිඳකට ඇද වැටුණු වන අලියෙකු බේරාගැනීමට වනජීවී නිලධාරින්ට හැකි වුණා.
දසත ප්‍රාදේශීය වාර්තාකරු පැවසුවේ; ගල්කිරියාගම හා විජිතපුර වනජීවී කාර්‍යාලවල නිලධාරීන් එක්ව පෙරේදා (07) පස්වරුවේ මෙම මෙහෙයුම සිදු කළ බවයි.
මෙලෙස වගා ළිඳට වැටී ඇත්තේ කලාවැව ජාතික උද්‍යානයේ සිට ගම් වැදුණු වනඅලියෙකු බව වනජීවී නිලධාරීන් පැවසුවා.
මෙම සත්ත්වයා වයස අවුරුදු 30ක් පමණ වන වනඅලියෙකු බවයි වනජීවී නිලධාරීන් සඳහන් කර ඇත්තේ.
ගල්කිරියාගම වනසත්ව අඩවි ආරක්ෂක කාර්යාලයේ හා විජිතපුර වනජීවී බීට්ටු කාර්යාලයේ නිලධාරීන් පැමිණ වනඅලියා ගොඩගැනීමේ මෙහෙයුම් ආරම්භ කළ අතර ඒ සඳහා ජේසීබී යන්ත්‍රයක් ද යොදා ගැනුණා.
ළිඳෙන් ගොඩට පැමිණි වනඅලියා ආරක්ෂිතව නැවත කලාවැව ජාතික උද්‍යානය දෙසට පලවා හැරීමටයි කටයුතු කෙරුණේ.
