සිරි දළදා වන්දනාවේ තෙවැනි දිනය අදයි

සිරි දළඳා වන්දනාවේ තෙවැනි දිනය අද (20) යි.

අප්‍රේල් මස 18 වැනි දින දහවල් 2.30ට ජනාධිපති අනුර කුමාර දිසානායක මහතාගේ ප්‍රධානත්වයෙන් වසර 16කට පසුව මෙවර දළදා ප්‍රදර්ශනය ආරම්භ කෙරුණා.

ලොව පුරා බෞද්ධයන්ගේ නොමද ගෞරවාදරයට පත් මෙරට බෞද්ධයන්ගේ මුදුන්මල්කඩ වන අති පූජනීය ශ්‍රී දළදා වහන්සේ සියැසින් දැකබලා ගැනීමේ අවස්ථාව දෙස් විදෙස් ජනතාවට උදා කරන ”සිරි දළදා වන්දනාවේ” තෙවැනි දිනය ඒ අනුව අදට යෙදී තිබෙනවා.

අද මධ්‍යාහ්න 12.30ට සිරි දළදා ප්‍රදර්ශනය ආරම්භ වීමට නියමිතව ඇති අතර එය පස්වරු 05.00 දක්වා පැවැත්වීමටයි කටයුතු යොදා ඇත්තේ.

“සිරි දළදා වන්දනාව” එළැඹෙන 27 දින දක්වා පුරා දින 10ක් පැවැත්වීමට නියමිතයි.

ආරම්භක දිනයේ සිට මේ දක්වා දළදා වහන්සේ වැඳ පුදා ගැනීම සඳහා දිවයිනේ නන් දෙසින් අති විශාල ජනතාවක් දළදා මාලිගාව වෙත පැමිණ සිටින අතර පැමිණ සිටින ජනතාවගේ කුස ගිනි නිවාලීම සඳහා 24 පැය පුරාවටම දළදා මාලිගාව විසින් දන්සල්ද ක්‍රියාත්මක කර තිබෙනවා.

මේ අතර ඊයේ (19) දහවල් 02.30ට ආරම්භ වූ සිරි දළදා වන්දනාව පස්වරු 05.30ට අවසන් කෙරුණා.

ඒ අනුව ඊයේ දිනයේදී එක්ලක්ෂ විසිපන්දහසකට ආසන්න සැදැවතුන් පිරිසකට ශ්‍රී දළඳා වහන්සේ වන්දනා කර ගැනීමේ වරම් හිමි වුණා.

“සිරි දළදා වන්දනාව” සඳහා දළදා මාලිගාව විසින් ප්‍රවේශ මාර්ග ත්‍රිත්වයක්ම හඳුන්වා දුන් අතර එම සෑම මාර්ගයක්ම සැදැහැවතුන්ගෙන් පිරි ඉතිරි ගිය ආකාරයක් දක්නට ලැබෙනවා.