ශ්රී ලංකා – මාලදිවයින් රාජ්ය තාන්ත්රික සබඳතාවලට 60 වසරක් සපිරෙන අවස්ථාවේ සිදුවන ශ්රී ලංකා ජනාධිපතිවරයාගේ මාලදිවයින් රාජ්ය සංචාරය, දෙරටම ආර්ථික වශයෙන් ඒකාබද්ධ සහ සමෘද්ධිමත් ඉදිරි ගමනක් කරා යන ගමනේ තීරණාත්මක සාධකයක් වනු ඇති බව මාලදිවයින් ජනාධිපති ආචාර්ය මොහමද් මුයිසු පවසනවා.
මාලදිවයින් ජනාධිපති ආචාර්ය මොහමද් මුයිසු මේ බව සඳහන් කළේ ජනාධිපති අනුර කුමාර දිසානායක වෙනුවෙන් ඊයේ (28) රාත්රියේ කුරුම්බා මෝල්ඩිව්ස් නිවාඩු නිකේතනයේ දී පැවති නිල රාත්රී භෝජන සංග්රහයෙන් අනතුරුව අදහස් දක්වමින්.
මාලදිවයින්-ශ්රී ලංකා සබඳතාවල පවතින ආර්ථිකමය වැදගත්කම මෙහිදී පෙන්වා දුන් මාලදිවයින් ජනාධිපතිවරයා කලාපයේ සමෘද්ධිය සහ ස්ථාවරත්වය ගොඩනැගීම සඳහා ශ්රී ලංකාව සමඟ වඩාත් සමීපව සහයෝගයෙන් කටයුතු කිරීමට අපේක්ෂා කරන බවද පැවසුවා.
දෙරට අතර ඓතිහාසික සබඳතා සැලකිය යුතු ලෙස වර්ධනය වී ඇති බව පැවසූ ඒ ඔහු වර්තමානයේදී සාම්ප්රදායික භාණ්ඩ හුවමාරුවෙන් ඔබ්බට ගොස් සංචාරක ව්යාපාරය, ඩිජිටල් තාක්ෂණය, ආරක්ෂක සහයෝගීතාව සහ සංස්කෘතික හුවමාරුව වැනි නවීන අංශ ආවරණය වන ලෙසින් එම වර්ධනය සිදු ව ඇති බවද පැවසුවා.
මෙම විවිධාංගීකරණය තුළින්, දෙරටෙහි ද්විපාර්ශ්වික සබඳතාවල ඉදිරිගාමී බව පමණක් නොව, වේගයෙන් වෙනස් වන ලෝකයේ ඉල්ලීම් සපුරාලීම සඳහා දෙරටෙහි පොදු අපේක්ෂාව පිළිබිඹු කරන බවද ජනාධිපති මුයිසු වැඩිදුරටත් සඳහන් කළා.
අධ්යාපන, සෞඛ්ය සහ මානව සම්පත් සංවර්ධනය වැනි ප්රමුඛ ක්ෂේත්රවල දෙරටෙහි දිගුකාලීන සහයෝගීතාව මෙහිදී සිහිපත් කළ මාලදිවයින් ජනාධිපතිවරයා, එම සහයෝගිතාව වත්මන් ආර්ථිකමය ප්රසාරණය සඳහා ශක්තිමත් පදනමක් සකස් කරන බව පෙන්වා දුන්නා.
එසේම, දෙරට අතර මෑතකාලීන ඉහළ මට්ටමේ සාකච්ඡා තුළින් මෙතෙක් භාවිතයට නොගත් නව ආර්ථිකමය විභවයන් සොයා බලමින් දෙරටෙහි ජනතාවගේ ආර්ථික අවස්ථා පුළුල් කරනු ඇති බවට ජනාධිපති මුයිසු විශ්වාසය පළ කළා.
පරම්පරා ගණනාවක් තිස්සේ, මාලදිවයින් වැසියන් ශ්රී ලංකාව හවුල්කරුවෙකු පමණක් නොව දෙවන නිවහනක් ලෙස ද සැලකූ බව ප්රකාශ කළ ඒ ඔහු, දෙරට අතර ද්විපාර්ශ්වික සබඳතාවලට පාදක වූයේ සවිමත් පෞද්ගලික සහ ආයතනික සම්බන්ධතා බවද ප්රකාශ කර සිටියා.
මෙම ඥාතිත්වයේ හැඟීම, දෙරටෙහි ආර්ථිකමය ප්රගමණය සඳහා සුවිශේෂි වාසි සහගත තත්ත්වයක් නිර්මාණය කරන බවද මාලදිවයින් ජනාධිපතිවරයා වැඩිදුරටත් සඳහන් කළා.
