රුපියල් කෝටි 6කට අලෙවි කිරීමට සැලසුම් කළ වාලම්පුරියක් සමග අත් අඩංගුවට ගත් සැකකරුවන් දෙදෙනා ලබන 14 වනදා දක්වා රක්ෂිත බන්ධනාගාර ගතකර තිබෙනවා.
සැකකරුවන් හැටන් වැඩබලන දිසා විනිසුරු වෙත ඉදිරිපත් කිරීමෙන් අනතුරුවයි මෙම නියෝගය ලබාදුන්නේ.
රුපියල් කෝටි 06කට අලෙවි කිරිමට තැත් කල වාලම්පුරියක් සමග එම සැකකකරුවන් දෙදෙනා ඊයේ අළුයම පොලිස් විශේෂ කාර්ය බලකායේ නිලධාරීන් විසින් හැටන් ප්‍රදේශයේ දී අත් අඩංගුවට ගනු ලැබුවා.
රුපියල් කෝටි 20ක පමණ වටිනාකමක් ඇති බවට සැක කෙරෙන මෙම වාලම්පුරිය රුපියල් කෝටි 6කට විකිනිමට සුදානම් බවට යුද හමුදාවේ බුද්ධි අංශයට ලැබුණු තොරතුරක් මත උපාය දූතයෙකු යොදවා වැටලීම කර තිබුණා.
ඔහු මෙම වාලම්පුරිය මිලදී ගැනීමට යන අකාරයෙන් ගොස් කරන ලද වැටලීමකදි මෙම සැකකරුවන් සමග වාලම්පුරිය ඊයේ දින අළුයම 1 පමන හැටන් ස්ට්‍රැත්ඩන් වතුයායට යන මාර්ගය ඉදිරිපිටදී අත් අඩංගුවට ගනු ලැබුවා.
මෙලෙස අත්අඩංගුවට ගෙන තිබුණේ හැටන් සහ උඩුපුස්සැල්ලාව ප්‍රදේශවල පදිංචි අවුරුදු 36, 39 වයස්වල පසුවන සැකකරුවන් දෙදෙනෙක්.
මේ අතර මඩකලපුව ප්‍රදේශයේදී වාලම්පූරි දෙකක් සමග සැකකරුවන් දෙදෙනෙකු අත්අඩංගුවට ගෙන තිබෙනවා.
ඊයේ සවස කල්මුණේ පොලිස් විශේෂ කාර්ය බලකායේ නිලධාරීන්ට ලැබුණු තොරතුරකට අනුවයි මඩකලපුව රෝහල පාර ප්‍රදේශයේ වැටලීම සිදුකර තිබුණේ.
එහිදී වාලම්පූරි දෙකක් අලෙවි කිරීමට ළග තබාගෙන සිටි අයෙකු සහ ඊට සහාය දුන් අයෙකු අත්අඩංගුවට ගෙන මඩකලපුව පොලිසියට භාරදී තිබුණා.
අවුරුදු 37 සහ 69 වයස්වල පසුවන සැකකරුවන් දෙදෙනා මඩකලපුව සහ චීන වරාය ප්‍රදේශවල පදිංචිකරුවන්.
