මොස්කව් හි අද (25) සිදුවූ පිපිරීමකින් ජ්‍යෙෂ්ඨ රුසියානු ජෙනරාල්වරයෙක් මිය ගොස් ඇති බව විදෙස් වාර්තා පවසනවා.
මොස්කව් හි බාලෂිකා ප්‍රදේශයේ නේවාසික ගොඩනැගිල්ලක මිදුලේ තිබූ මෝටර් රථයක් පුපුරා යාමෙන් මෙම ජෙනරාල්වරයා මියගොස් ඇති බවයි තොරතුරු වාර්තා වුණේ.
මෙලෙස මියගොස් ඇත්තේ රුසියානු හමුදාවේ ප්‍රධාන මෙහෙයුම් අධ්‍යක්ෂ මණ්ඩලයේ නියෝජ්‍ය ප්‍රධානී ලුතිනන් ජෙනරාල් යාරොස්ලාව් මොස්කලික් බවයි වාර්තා වන්නේ.
රුසියානු විමර්ශන කමිටුව පැවසුවේ මෙම පිපිරීම සිදුකර ඇත්තේ කැබලිවලින් පිරුණු වැඩිදියුණු කළ පුපුරණ ද්‍රව්‍යයක් යොදාගෙන බවයි.
රුසියාවේ නීතිය ක්‍රියාත්මක කරන ආයතනවල මූලාශ්‍ර සහිත ටෙලිග්‍රාම් නාලිකාවක් වන බාසා පැවසුවේ, මොස්කව් කලාපයේ බාලෂිකා නගරයේ නවතා තිබූ මෝටර් රථයක බෝම්බයක් දුරස්ථව පුපුරුවා හැර ඇති බවත්, ජෙනරාල්වරයා එම ප්‍රදේශයේම ජීවත් වූ අයෙක් බවයි.
පසුගිය දෙසැම්බර් මාසයේදී, මොස්කව්හි මහල් නිවාස ගොඩනැගිල්ලක් ඉදිරිපිට විදුලි ස්කූටරයක සඟවා තිබූ පුපුරණ ද්‍රව්‍යයක් පුපුරා යාමෙන් රුසියානු ජ්‍යෙෂ්ඨ ජෙනරාල්වරයෙකු ඝාතනයට ලක් වුණා.
