අනතුරකින් පසු මියගොස් සිටි පුද්ගලයෙකුගේ මළ සිරුරක් බණ්ඩාරගම දිසාරෝහලේ වෛද්‍යවරුන්ට පරුෂ වචන කියමින් සහ තර්ජනය කර කාර්යය මණ්ඩලයට හා එහි දේපළවලට පහර දී පැහැරගෙන ගොස් ඇති බව තොරතුරු වාර්තා වනවා.
අප ප්‍රාදේශීය වාර්තාකරු පැවසුවේ එලෙස රැගෙන ගොස් ඇත්තේ මැදගම ප්‍රදේශයේ පුද්ගලයෙකුගේ මළසිරුරක් බවයි.
ඊයේ (17) රාත්‍රියේ බණ්ඩාරගම – කැස්බෑව මාර්ගයේ වැල්මිල්ල ප්‍රදේශයේ දී යතුරුපැදි දෙකක් එකිනෙක ගැටීමෙන් පුද්ගලයන් දෙදෙනෙකු තුවාල ලැබූ අතර එයින් එක් පුද්ගලයකු බරපතළ තුවාල ලබා රෝහලට රැගෙන එන විටත් මියගොස් තිබුණා.
එම පුද්ගලයාගේ ඥාතීන් සහ හිතවතුන් 15 දෙනෙකුට අධික පිරිසක් එකවරම රෝහලේ හදිසි ප්‍රතිකාර ඒකකය වෙත කඩා වැදී වෛද්‍යවරුන්ට පරුෂ වචන කියමින් තර්ජනය කර කාර්ය මණ්ඩලයට ද පහර දී ට්‍රොලිය මත දමා තිබූ මළ සිරුර රැගෙන ලොරියක පටවාගෙන පිටව ගොස් තිබූ බවයි වාර්තා වන්නේ.
පැමිණි පිරිස රෝහලට ඇතුල්වන අවස්ථාවේදී ඇතුළු වීමේ දොරටුවලට ආරක්ෂක හිස් වැසුම්වලින් වීදුරුවලට ද පහරදීමෙන් ඒවාට ද අලාභ හානි වී තිබෙනවා.
පැමිණි පිරිසෙන් බහුතරයක් දෙනා බීමතින් සිටි බවට ද අනාවරණය වී ඇතැයි පොලීසිය සඳහන් කළ බවයි දසත වාර්තාකරු පැවසුවේ.
එම පුද්ගලයන් මළසිරුර ලොරියක පටවාගෙන පානදුර මූලික රෝහලට රැගෙන ගොස් ඇති බව ද වාර්තා වනවා.
පසුව එම ස්ථානයට ගිය බණ්ඩාරගම පොලිසියේ ස්ථානාධිපතිවරයා මියගිය පුද්ගලයාගේ එක් පුත්‍රයකු අත්අඩංගුවට ගත් අතර රෝහල් කාර්යය මණ්ඩලයට පහර දුන් ඥාති දියණියක් ද අත්අඩංගුවට ගැනුණා.
කෙසේවෙතත් රෝහලේ ආරක්ෂිත කැමරා පද්ධතියේ දර්ශන අනුව සෙසු සැකකරුවන් ව අත්අඩංගුවට ගැනීමට විමර්ශන ක්‍රියාත්මකයි.
wpDiscuz
