තමන්ට හිමිවිය යුතු මාස 09ක වැටුප් මෙතෙක් ගෙවා නොමැති බවට පවසමින් කොළඹ වරාය නගරය තුළ ඉදිකිරීම් අංශයේ සේවය කරන කම්කරුවන් පිරිසක් අද (06) උද්ඝෝෂණයක නිරත වුණා.
මෙම උද්ඝෝෂකයින් විරෝධතා පුවරු ඔසවමින් ජනාධිපති ලේකම් කාර්‍යාලය අබියස උද්ඝෝෂණයේ නිරත වූ බවයි දසත ප්‍රාදේශීය වාර්තාකරු පැවසුවේ.
මෙම සේවකයින් මෑන් පවර් ආයතන මගින් සේවයේ යොදවා ඇති අතර මොවුන්ගේ ආයතනයට වැටුප් ගෙවන්නේ වරාය අධිකාරිය හරහා බවත් වරාය අධිකාරියට එම මුදල් ගෙවන්නේ චයිනා හාබර් සමාගමෙන් බවත් ඔවුන් පවසනවා.
සේවකයින්ගේ වැටුප් සම්බන්ධව වරාය අධිකාරියෙන් විමසු විට වරාය අධිකාරිය පවසා ඇත්තේ; චයිනා හාබර් සමාගමෙන් මුදල් නොලැබුණු බවයි.
නමුත් චයිනා හාබර් සමාගම සේවකයින්ට පවසා ඇත්තේ වරාය අධිකාරියට අදාළ මුදල් පියවා ඇති බවටයි විරෝධතාකරුවන් චෝදනා කරමින් පෙන්වාදෙන්නේ.
කෙසේ හෝ තමන්ට අදාළ වැටුප් ලබාදෙන ලෙසයි මෙම සේවකයින් රජයෙන් ඉල්ලා සිටින්නේ.
