මාලි රාජ්‍යයේ ඊසානදිග ප්‍රදේශයේ දී ඉස්ලාමීය සටන්කාමීන් බෝට්ටුවකට එල්ල කළ ප්‍රහාරයකින් සිවිල් වැසියන් 49 දෙනෙකු ජිවිතක්ෂයට පත්වී තිබෙනවා.
ඔවුන් හමුදා කඳවුරකට ද ප්‍රහාරයක් එල්ල කළ අතර, එම ප්‍රහාරයෙන් සෙබළුන් 15 දෙනෙකු මිය ගිය අතර, සටන්කාමීන් 50ක් පමණ ද මිය ගොස් ඇති බවයි විදෙස් මාධ්‍ය වාර්තා කළේ.
සටන්කාමීන්ගේ මෙම ප්‍රහාරය හේතුවෙන් මාලි රජය දින තුනක ජාතික ශෝක කාලයක් ද ප්‍රකාශයට පත් කර තිබෙනවා.
ගාඕ නගරයේ සිට මොප්ටි දක්වා නයිජර් ගංගාව ඔස්සේ ගමන් කරමින් සිටියදී සටන්කාමීන් බෝට්ටුවට ප්‍රහාර එල්ල කළ බවයි වාර්තා වන්නේ.
මාලි රාජ්‍යයේ නිසි නඩත්තුවකින් මෙන්ම ගුණාත්මක බවින් අඩු මාර්ග සහ දුම්රිය මාර්ගද නොමැති කලාපයක ගංගාව ප්‍රධාන ප්‍රවාහන මාධ්‍යයක් ලෙසට භාවිත කෙරෙනවා.
අල්කයිඩාවට සම්බන්ධ කණ්ඩායමක් වන Jamaat Nusrat al-Islam wal-Muslimin (JNIM) කියා සිටියේ තමන් හමුදා කඳවුරට ප්‍රහාරය එල්ල කළ නමුත් බෝට්ටු ප්‍රහාරයක් සිදු නොකළ බවයි.
මාලි රාජ්‍ය 2020 වසරේ සිට හමුදා ජුන්ටාවක පාලනය යටතේ පවතිනවා.
එවක ජනාධිපති ඊබ්‍රාහිම් බූබකාර් කීටාට එරෙහි මහජන විරෝධතාවලින් පසුව ජුන්ටාව බලය අල්ලා ගන්නා විට ඊට විශාල මහජන සහයෝගයක් පැවතුණා.
මාලි හමුදා බලධාරීන් ප්‍රංශ හමුදා සහ එක්සත් ජාතීන්ගේ සාම සාධක භටයින්ට රටින් පිටව යන ලෙස නියෝග කර ඇති අතර ඔවුන් වෙනුවට රුසියානු කොන්ත්‍රාත්කරුවන්ට ද ආරාධනා කර තිබෙනවා.
අල්-කයිඩා සහ ඉස්ලාමීය රාජ්‍ය සමඟ සම්බන්ධකම් ඇති කැරැල්ලක් 2012 වසරේ දී මාලි හි උතුරේ ආරම්භ වුණා.
එතැන් සිට ඉස්ලාමීය සටන්කාමීන් සහේල් ප්‍රදේශය පුරා, විශේෂයෙන් බර්කිනා ෆාසෝ සහ නයිජර් දක්වා ව්‍යාප්ත වී තිබෙනවා.
