බම්බලපිටිය ප්‍රදේශයේ සම්බාහන ආයතනයක සේවාවන් ලබා ගැනීම සඳහා පැමිණි වෛද්‍යවරයෙකු බියගන්වා ඔහු සතු රුපියල් දස ලක්ෂයකට අධික මුදලක් මාර්ගගත ක්‍රමය ඔස්සේ බැංකු ගිණුමකට බැර කරවා ගත් බව කියන සිද්ධියක් බම්බලපිටිය පොලිසිය මගින් අත්අඩංගුවට ගෙන හඳුනා ගැනීමේ පෙරෙට්ටුවක් සඳහා අධිකරණය වෙත ඉදිරිපත් කළ සැකකරුවන් හය දෙනෙකුගෙන් සිව් දෙනකු මෙම 18 දින දක්වා රක්ෂිත බන්ධනාගාර ගත කරන ලෙස නියෝග කළ කොළඹ අතිරේක මහේස්ත්‍රාත් පසන් අමරසේන මහතා එම සිද්ධියට අනුබල දුන් බව කියන මෙවර මහ මැතිවරණයට ඉදිරිපත්ව සිටින අපේක්ෂිකාවක් හා ඇගේ සැමියා ඇප මත මුදා හරින ලෙස අද (12) නියෝග කළා.
දසත අධිකරණ වාර්තාකරු පැවසුවේ; බම්බලපිටිය පොලිසිය මගින් අත්අඩංගුවට ගත් සැකකරුවන් හයදෙනා අද හඳුනා ගැනීමේ පෙරෙට්ටුවකට ඉදිරිපත් කිරීමෙන් අනතුරුව සිද්ධියේ පැමිණිලිකරු විසින් සැකකරුවන් හය දෙනා හඳුනාගනු ලැබූ බවයි.
වෛද්‍යවරයාට තර්ජනය කර මුදල් ලබාගත් බවට හඳුනාගත් සැකකරුවන් සිව්දෙනා එලෙස රක්ෂිත බන්ධනාගාරගත කෙරුණු අතර සිද්ධියට අනුබල දුන් මහ මැතිවරණයේ අපේක්ෂිකාව හා ඇගේ සැමියා ඇප මත මුදා හැරීමට නියම කෙරුණා.
පැමිණිලිකාර වෛද්‍යවරයා මාධ්‍ය ජාලා මෘදුකාංගයක් හරහා සම්බන්ධ වූ පුද්ගලයකු හරහා සම්බාහනයක් කර ගැනීම සඳහා බම්බලපිටිය ප්‍රදේශයේ තට්ටු නිවාස සංකීර්ණයක නිවසක් වෙත ගොස් සිටි අවස්ථාවේ දී සැකකාර පුද්ගලයන් සිව්දෙනා පැමිණිලිකාර වෛද්‍යවරයාගේ නිරුවත වීඩියෝගත කර එම දර්ශන සමාජ මාධ්‍ය ජාලා වෙත මුදා හරින බවට බියගන්වා ඔහු සතු රුපියල් දස ලක්ෂයකට අධික මුදලක් මාර්ගගත ක්‍රමය ඔස්සේ ඔවුන්ගේ ගිණුම්වලට බැර කරවාගෙන ඇති බව පොලිසිය අධිකරණයට දැනුම්දුන්නා.
කොළඹ ප්‍රදේශයේ පදිංචිකරුවන් වන සුදාරක දේවප්‍රිය ,මොහොමඩ් සාදිප් ,රාජපක්ෂගේ අශේන් දිමුතු එරංග ඇතුළු සැකකරුවන් සිව්දෙනෙකු මෙලෙස රක්ෂිත බන්ධනාගාර ගත කිරීමටයි නියෝග කෙරුණේ.
මෙලෙස ඇප මත මුදා හැරුණේ යන ”අරගල සංවිධානයේ” කොළඹ දිස්ත්‍රික් අපේක්ෂිකාවක් වන මාලා ප්‍රනාන්දු හා ඇගේ සැමියා වන චමින්ද පුෂ්පකුමාර යන දෙදෙනායි.
