මත්ද්‍රව්‍ය සහ පාතාල ක්‍රියාකාරකම් රැසකට සම්බන්ධ බව කියන අතුරුගිරිය ජෙරමි ඇතුළු තවත් සැකකරුවන් තිදෙනෙකු අත්අඩංගුවට ගෙන තිබෙනවා.
වැලිගම පොලිස් වසමේ පොල්අතුමෝදර ප්‍රදේශයේ ටී 56 ගිනි අවියක් සහිතව පිරිසක් සැරිසරන බවට වැලිගම පොලිසියට ලද තොරතුරක් මත වැලිගම මූලස්ථාන පොලිසියේ විශේෂ පොලිස් කණ්ඩායමක් එම ප්‍රදේශය වෙත ගොස් තිබේ .
එහිදි මත්ද්‍රව්‍ය සහ පාතාල ක්‍රියාකාරකම් සම්බන්ධයෙන් සැකකරුවකු වන වයස (39 ) වන අතුරුගිරිය ජෙරම් සහ අතුරුගිරිය ප්‍රදේශයේ සහ පන්නිපිටිය ප්‍රදේශයේ පදිංචි වයස 22, 25, සහ 35 වයසේ තවත් පුද්ගලයන් තිදෙනෙකු සහ ඔවුන් පැමිණි බව කියන මෝටර් රථයක් ද (3 ) දින පස්වරුවේදි වැලිගම පොලිසිය මගින් අත්අඩංගුවට ගෙන තිබිණි .
අත්අඩංගුවට ගත් සැකකරුවන් මාතර මහෙස්ත්‍රාත් අධිකරණය වෙත ඉදිරිපත් කල බවද එහිදි මෙම සැකකරුවන් සම්බන්ධයෙන් වැඩිදුර විමර්ශන කටයුතු සඳහා අධිකරණයෙන් රැඳවුම් නියෝග ලබාගත් බවද පොලිසිය පැවසීය .
වැලිගම මූලස්ථාන පොලීසිය පරීක්ෂණ පවත්වයි.
