වදුරු උණ (Monkey Pox Virus ) වැළදුන රෝගීන් දෙදෙනෙකු කොළඹ අයි.ඩී.එච්. රෝහල වෙත වෛද්‍ය ප්‍රතිකාර සදහා ඇතුළත් කළ බව සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා පවසනවා.
ඩුබායි හි සේවය කළ පුද්ගලයෙකුට හට මෙම රෝගය වැළදී සුව වී ඇති අතර ඔහු ශ්‍රී ලංකාවට පැමිණීමෙන් අනතුරුව 25 හැවිරිදි බිරිඳට සහ දින කිහිපයක් වයසැති සිඟිති දියණියට ද රෝගය වැළදී ඇති බවටයි අනාවරණ වී ඇත්තේ.
ඔවුන් මේ සදහා වෛද්‍ය ප්‍රතිකාර ලබා ගැනීමට කොළඹ රෝහලක් වෙත පැමිණ සිටියදී රෝගී තත්ත්වය සම්බන්ධයෙන් අනාවරණය වී තිබෙනවා.
මේ වනවිට ඔවුන්ගේ නිවසෙහි වැඩිහිටියන් දෙදෙනෙකු වාසය කරන අතර ඔවුන්ට මෙම රෝගය වැළදීමේ අවදානමක් නොමැති බැවින් ඔවුන් නීරෝධායන ක්‍රියාවලිය සදහා යොමු කිරීම අවශ්‍ය නොවන බවයි වෛද්‍ය අසේල ගුණවර්ධන මහතා ප්‍රකාශ කළේ.
වදුරු උණ ආසාධිත රෝගීන් දෙදෙනා කොළඹ අයි.ඩී.එච්. රෝහලේ 04 ඒ වාට්ටුවේ මේ වනවිට නේවාසික ප්‍රතිකාර ලබමින් පසු වනවා.
ඔවුන්ගේ තත්ත්වය යහපත් වන අතර වෙනත් අය කරා මෙම රෝගය පැතිර යාමේ අවදානමක් නොමැති බවයි වෛද්‍ය අසේල ගුණවර්ධන මහතා වැඩිදුරටත් ප්‍රකාශ කළේ.
